Oarsoaldeko Hitza

Urteko lehen batzarraldian gai gehienak tramite hutsekoak ziren. Hauen artean, bi mozio eztabaidatu zituzten ohiko batzarraldian zeuden hamar zinegotziek -EAE-ANVko bat, OiartzunBai-ko beste bat eta Ezker Batua-Berdeetakoa falta ziren-. Biak atera ziren aurrera, bata EAE-ANVren aldeko sei botoekin eta bestea, aho batez.

Aho batez onartu zen mozioa Euskal Herrian Euskaraz-ek sartutakoa da, «UEMAren irizpideek azken lau urteetan izandako atzerapausoak» salatuz eta «irizpideak berriz betetzeko» eskatzen zuten, «Udalak %100ean euskaraz funtzionatzeko urratsak eman ditzan». Herriko 42 eragileren babesa ere bazuen mozioak.

«Udal eredugarria»

EAE-ANVko Jabi Elizasuk hitz egin zuen taldearen izenean, Euskara zinegotziak, hain zuzen ere. «Herri programan kezka hau agertu genuen, eta dagoeneko bideratzen hasi gara», esan zuen. Udal Barruko Plana egiten ari direla azaldu zuen, eta UEMAko teknikariekin ere saioak egin dituztela.

OiartzunBaik (OB) ere mozioarekin bat egin zuen. Xanet Arozena bozeramaileak zehaztu zuenez, «Udalak euskaraz funtzionatzen du azken urte luzetan, baina herritar batzuek mugak dauzkate eta logikoa da haiei erdaraz egitea».

Martin Beramendik «azken lau urteetan ere euskararen alde ekimenak egin direla» baieztatu zuen.

EHEk eta EAE-ANVk «filosofia aldaketa izan zela» uste dute. «Egia da Udalak kanpoko esparruetan planak bultzatu dituela, baina ez da eredugarri izan azken lau urteetan», esan zuen Elizasuk.

Duela bi urte aurkeztutako mozioa

EHEko kideak zeuden ikusleen artean, eta hauek azaldu zutenez, «mozioa duela bi urte sartu genuen bera da, eta orduan ez zen gai zerrendan sartu ere egin».

Aitzol Perez de San Romanek esan zuenez, «euskararen gaiak ezin du momentuko egoera politikoaren baitan aldatu, herritarren eskaera baita euskaraz funtzionatu nahia izatea».

Torturaren kontrako mozioa

Beste mozioa torturaren inguruan sartu zuen EAE-ANV-k. Eurek babestuta atera zen aurrera, OBko sei zinegotziak abstenitu egin baitziren.

«Tortura bukatzea exijitu, torturatuei elkartasuna adierazi, Euskal Herriaren kontra sistematikoki erabiltzen dela salatu, Euskal Herriaren eta herritarren kontrako eskubide urraketa guztiak salatu eta neurriak hartzeko borondatea» aipatzen ziren mozioan. Aitor Etxeberria alkateak uste duenez, «gatazka politikoa bukatzen denean tortuta bukatuko da».

«Partziala» iruditu zitzaion mozioa OB-ri, Arozenaren hitzetan. «Urraketa guztiak» salatzen zituztela errepikatu zion Etxeberriak.

Plastikozko boltsa beltzak ere banatu zizkieten OBko sei zinegotziei ikusleek, «honen alde zaudete» esanaz.

Ergoienen eta Gurutzen, lanak

Era berean, batzarrean azaldu zutenez, Ergoiengo Penadegiko zubian baranda jartzeko lanak esleitu dituzte.

Gurutze auzoan ere bide batzuk konpontzeko lanak ere esleitu dituzte.