Oarsoaldeko Hitza

Inoiz baino lehenago iritsi dira aurten inauteriak; oharkabean, segur aski, bat baino gehiagorentzat. Baina azkar iritsi izana ez da oztopo bihurtu jaia behar bezala abiatzeko, ohiko indarrarekin hasi baitzen atzo mozorroen festa. Errenteria-Oreretan, ohi bezala, azeri dantzarekin ekin zioten inauteriei; emakumez jantzitako gizonei eta gizonez jantzitako emakumezkoei begira, herritarrek irribarrez hartu zuten koloreen jaiaren hasiera. Lezon, berriz, jende andana bildu zen Trapujaleren etorreran, usadioari jarraiki.

Trapujalek, gainera, 20 urte betetzen ditu aurten, eta urteurrenak herritar guztiak aztoratu ditu. Hasteko, atzo arratsaldean, Jaizkibel Azpi Herri Eskolan herriko txikienek ongietorria egin zioten Lezoko inauterietako protagonista nagusiari. Txapeletan eta alkandoratan trapuak behar bezala itsatsi eta, dantza eta abesti artean, urteroko ahots sakona entzuteko prest zeudenean, Trapujale eskolako balkoian agertu zen. Oihu eta irri artean iritsi zen, beraz, zaldi buruhezurra duen pertsonaia.

Gero, trapuak alde batera utzi eta bestelako mozorroak nola egin ikasten aritu ziren herriko txikienak: drakularen makillajea egin, zakar poltsekin soinekoa prestatu... Askok, datozen egunetarako badaezpadako mozorroa atontzeko baliatu zuten mozorro tailerra.

Suziri artean, Jaizkibeldik behera

Baina Lezon, eguneko unerik garrantzitsuena, eguzkia sartu eta handik ordubetera heldu zen: Martizkone baserritik Trapujale jaitsi zen, suziriek bidea argitzen ziotela. Auñamendi kalearen hasieran, Tomas Garbizu Musika Eskolako ikasleek itxaron zioten, eta, handik aurrera, herriko kaleetan barrena eta musikak lagunduta, herritarrak agurtu zituen jada 20 urte bete dituen pertsonaiak.

Gurutze Santuaren plazara iristean, ohi duen bezala, herritarrei inauteri zoriontsuak pasatzeko gonbitea egin zien Trapujalek, eta arranpuilaren ordua iritsi zen. Askok egin zuten salto orduan, intxaurrak jasotzeko asmoz.

Aurkenerena omenduz

Arranpuilaren ondotik, Trapujale oroigarria eman zioten Joseba Aurkenerena idazle eta Kultura zinegotzi ohiari; beste herritar askoren artean, Aurkenerenak orain hogei urte herriko inauteriak bultzatu izana eskertu nahi izan zioten modu honetara. Txalo artean eta pozik jaso zuen oroigarria Aurkenerenak.

Azeri Dantza, txantxarako beta

Errenteria-Oreretan, bien bitartean, Azeri Dantza izan zen inauterien hasiera iragarri zuena, ohi bezala, Ereintza Dantza Taldearen eskutik.

Motorrak berotzeko poteoaren ondotik, parte-hartzaileak Juan Olazabal kaletik irten ziren dantzan, herriko kale nagusienak zeharkatu eta 20:00ak inguru Herriko Plazara iristeko. Ibilaldian zehar, giro ederra sortu zuten Ereintzakoek, haien txantxak, dantzak eta oihuak lagun. Susto ederra eraman zuen haiekin topo egindako herritar bat baino gehiagok; baina, ezustea pasata, oinezkoek irribarrez jarraitu zituzten dantzarien komeriak. Etxeko txikienek, bereziki.

Ikastetxeak

Gaur, nagusiki, ikastetxeek hartuko dute festaren lekukoa, ikastetxe bakoitzak mozorratzeko aukeraturiko gaiekin eta doinuekin. Errenteria-Oreretako Cristobal Gamon Ikastetxean, esaterako, inudez eta artzainez jantziko dira ikasle gazteenak, 11:30ean, eskolako patioan. Arratsaldean, berriz, euskal inauteria irudikatuko dute.

Tabernak

Ikastetxeak ez dira, noski, inauteriak ospatzen dituzten bakarrak. Tabernek ere paper garrantzitsua jokatzen dute egunotako gauak girotzeko orduan. Hala, guztiak mozorratzen dira; batzuk besteak baino hobeto, bai, baina ezin uka guztiek egin ohi duten ahalegina.

Mozorratzeaz gain, inauterietako lehiaketa ere antolatu dute Errenteria-Oreretako Aker, Zuzen, Limerick, Txilintxa, Maiaritz, Juli eta Zazka tabernek: Bartzelonan jokatuko den bat formulako lasterketarako bidaia bi lagunentzat, hotela eta hiru eguneko sarrerak barne. Parte hartzeko baldintza bakarra: gaur eta bihar, bezeroak mozorratuta joatea taberna hauetara. Irudimenak ez duelako mugarik inauterietan. Aspertzeko aitzakiarik ez, beraz.