Oarsoaldeko Hitza

Errenteriako Udalari dagozkion Pasaiako Portuko eskuduntzak Gipuzkoako Aldundiaren esku uztea erabaki du herriko Udalbatzak. Agintean dagoen gobernu taldeak (PSE-EE, EAJ eta EA) aurkeztu zuen mozioa atzoko udalbatzarrean, eta EAE-ANVk eta Ezker Batua-Berdeak koalizioak izan ezik, gainontzeko alderdiek baiezko botoa eman zuten.

«Erabaki honi esker Pasaiako Portuko Plan berezia behin betirako martxan jar daitekela uste dugu, eta horixe da gure helburua. Izan ere, gaur egungo blokeo egoerak ez dio inori onik egiten», azaldu zuen Juan Carlos Merino alkateak.



Mozioaren nondik norakoa

Udalbatzak atzo onartu zuen mozioak lau puntu ditu. Lehenengoan, «Pasaiako Portuko Antolamendurako plan berezia xehetasunez aztertzeko konpromisoa» hartu dute mozioaren egileek. Halaber, «Udalaren interesak ahalik eta ondoen gordetzeko beharrezkoak diren alegazioak eta iritziak aurkeztuko dituztela» azpimarratu dute.

Bigarren puntuan, Gipuzkoako Foru Aldundiko Mugikortasun eta Lurralde Antolamendurako Sailari eskatzen diote, «Pasaiako Portuko Plan Bereziak eragiten dituen udalerriekin komunikazioa eta koordinazioa mantentzeko. Hartara, Plan Bereziaren behin betiko onespen garaian ahalik eta adostasun handiena lortu ahal izango da».

Hirugarren puntuan, Portuko Agintaritzari eskatzen diote «ingurumenaren aldeko neurriak jasoko dituen plana onartzea eta martxan jartzea. Neurri horien helburua atmosferaren kutsadura-indizea, zarata maila eta lurzoruaren eta badiako uren kutsadura murriztea da».

Laugarren eta azken puntuan, aldez aurretik aipatutako guztiaren berri Portuko Agintaritzari eta Gipuzkoako Foru Aldundiaren Mugikortasun eta Lurralde Antolamendurako Sailari emateko konpromisoa hartu dute mozioaren egileek.