Oarsoaldeko Hitza

Luzuriagako orubea urbanizatzeari ekin diote. Lurrak garbituta, lur azpiko azpiegiturak atontzeari ekin diote, eta egun hauetan porlanazko dimentsio handiko hoditeria ari dira lur azpira sartzen.

Urbanizazio lanek 16 hilabete iraungo zutela iragarri zuten bere garaian, eta beraz, baliteke, urte bukaerarako urbanizazio lanak bukatuak egotea.

Iragarritako epeak betez gero, datorren urte hasieran abiatuko dira eraikuntza lanak. Ordurako dena prest egon dadin, urte honetan zehar eraikuntzari lotutako proiektuak landu eta aurkeztu behar dituzte.

Kutsadura maila, uste zutena baino «askoz handiagoa»

Hasieran iragarritakoa baina dezente gehiago luzatu dira lurrak deskontaminatzeko lanak. Barrutiko alkateorde Ander Pozak azaldu duenez, «langileek Luzuriagako plano zaharrak zituzten, eta horien bidez olioak eta bestelako hondakin kutsagarriak aldez aurretik non ziren bazekitela uste zuten. Lurrak mugitzen hasi orduko, ordea, filtrazio ugari topatu dituzte, baita, planoetan ageri ez ziren bestelako lur azpiko biltegiak ere. Horiek guztiak garbitzen ia urtebete pasatu dute. Iazko martxoan etorri zen Etxebizitza eta Gizarte Gaietarako kontseilari Javier Madrazok lanen hasiera ekitaldira.

Aparkalekua

Urbanizazio lanak abiatuta, kezka zabaldu da barrutian. Izan ere, lanak hasiz geroztik murrizten joan baita Luzuriagan aparkatzeko aukera. Hala eta guztiz ere, oraindik asko dira han autoa uzten dutenak. Lanak aurrera joan ahala, baina, jakina da autoak handik atera beharko direla. Udalean arazoaren jabe dira, eta Alkateordeari galdetuta «balizko alternatibak aztertzen ari direla» eman du jakitera.

Hala ere, oraingoz Luzuriagan aparkatzeko aukera izango dela jakinarazi du barrutiko alkateordeak. «Obraren beste eremuetan aurreratu nahi dute oraingoz, eta bitartean aparkatzeko aukera egongo da, epe zehatzik eman ez diguten arren», esan du Pozak.

Udal arduradunek, hala ere, gerora zer egin pentsatzen dihardute. Esan dutenez, Beissierreko orubea ahalik eta gehien probesteko asfaltatu eta ongi moldatzeko aukera aztertzen ari dira «orube horretan askoz ere auto gehiago sar daitezkeela uste baitute». Lehen Beissier fabrika egon zen tokian, gerora parkea atondu behar dute, baina baliteke, behin-behineko alternatiba gisa orube hura asfaltatzea.

Bestelako alternatibak ere ari omen dira aztertzen, baina oraingoz ez dute erabaki zehaztik hartu.