Oarsoaldeko Hitza

Hezkuntza

Ikastolen Elkartearen egitasmo berriak ikasle bakoitzaren jarraipena erraztuko du; esperientzia pilotoa da

goiatz labandibar

Haurtzaro Ikastolako LH 2., 4. eta 6. mailako 225 ikaslek Aste Santutik bueltan Ikasys proiektua erabiltzen hasiko dira.

Ikastolen Konfederazioak martxan jarriko duen azken proiektua da Ikasys.

Eskualdeko hiru ikastoletako zuzendariak pozik daude egitasmoarekin. «Metodologia berri bat eskainiko dugu, ikasgelan tresna bat gehiago izango da, oso indartsua», azaldu du Joxemi Zabala Orereta Ikastolako zuzendariak.

Ikasys-en nondik norakoak

Ikasys egitasmoaren baitan, ikasle bakoitzak ordenagailu eramangarri bat izango du, liburu baten tamainakoa. Euskara, Gaztelera, Ingurumena, Matematika eta Ingeleseko 225.000 ariketa izango ditu ikasle bakoitzak.

Modu sistematikoan lantzeko arloak landuko dituzte Ikasys-ekin. Hala ere, ordenagailuek beste potentzialtasun batzuk ere badituzte: Internetera lotu daitezke edota testuak sor daitezke.

«Hezkuntza zuzeneko harremanean oinarrituko da, beti bezala, eta irakaslea ez du sekula makinak ordezkatuko, baina erabilgarria izango da ikasgelan», esan du Agustin Migeltorena Pasaia-Lezo Lizeoko zuzendariak.

«Ikasle bakoitzaren erritmoa errespetatzea da proiektu honetan garrantzitsuena», azaldu du Sorkunde Lekuona Haurtzaro Ikastolako zuzendariak.

«Ikasleen gaitasunetara eta erritmoetara gehiago egokitzea ahalbidetuko du Ikasys-ek», gehitu du Zabalak.

Aitzindariak Espainiako Estatuan

Ikasys proiektua lantzen 2000. urtean hasi ziren Ikastolen Elkartean. Hasieran, Kataluniako hezkuntza komunitatearekin batera ahalegin bat egin zuten, baina azkenean bide ezberdinetatik joan ziren.

«Espainiako Estatuan, Ikastolak izango gara lehenengoak horrelako proiektu bat ikasgeletara eramaten», dio Migeltorenak. Orain arte paperean egindako hainbat lan ordezkatuko ditu Ikasysek.

Teknologia berrien aldeko apustua

«Ikastolen Elkarteak teknologia berriei ematen dieten garrantzian kokatu behar da egitasmoa», uste du Lekuonak.

Ikastoletako 40 profesional aritu dira egitasmoa prestatzen. «Maitasun handiz egindako lana da, eta horien lana aitortu eta eskertu beharrekoa», gehitu du Migeltorenak.

«Ikastola guztien proiektua»

Haurtzaro izango da ikastola pilotoetako bat, baina ez diote garrantziarik ematen horri Oiartzunen. «Guri suertatu zaigu piloto izatea, beste proiektuetan beste ikastola batzuei egokitu zaien bezala. Ikastola guztien proiektu bat da hau».

Ikastola gutxi batzuetan egiteak bere arrazoia baduela azaldu dute: «Prozesuak hala eskatuta, emaitzak kontrolatzea erabaki dugu, talde txikietan probatzea».

Datorren ikasturtetik aurrera, ikastola gehiagotan

Oraingoz, Gipuzkoako hiru ikastolatan egingo dute proba: Donostiako Santo Tomas Lizeoan, Orioko Ikastolan eta Oiartzunen.

Datorren ikasturtean, ikastola pilotoak gehitu egingo dira. Horien artean, Orereta Ikastola egongo da.

«Ahal den epe motzenean Euskal Herriko Ikastola guztietan martxan jarri nahi dugu», azaldu du Migeltorenak. 12-15 hilabeteko epeaz hitz egiten dute.

Ministerioaren laguntza

Espainiako Hezkuntza Ministerioak diruz lagundu du Ikastolen Elkarteko proiektu hau. «Proiektu berritzailea eta garrantzitsua dela hezkuntzan adierazten du Espainiako Hezkuntza Ministerioak laguntzeko», dio Lekuonak.

Diruaren zati handiena proiektua bera diseinatzeko izan da. Foru Aldundien laguntza ere jaso dute.

Aurrerantzean, Ikasys bezalako sistema bat landu nahi dute DBHko ikasleekin ere bai.