Oarsoaldeko Hitza

Laguntasuna Elkarteak antolatutako XXV. Errenteria Hiria Txirrindularitza Sarian 101 txirrindularik parte hartu zuten herenegun arratsaldean. Gazte Mailako denboraldiko lehenengo proba izan zen, eta halakoetan txirrindulari asko elkartzea ez da erraza izaten. Beraz, antolatzaileak «gustura» azaldu ziren parte-hartzaile kopuruarekin.

Eguraldiak inoiz ez bezala lagundu zuen, eta jende asko gerturatu zen proba ikustera. 64 kilometroko ibilbidea prestatu zuten antolatzaileek, Errenteria-Oreretako Gamon Zumardian hasi eta bertan amaitu. Tartean, Oiartzungo gaina lau aldiz eta Gaintxurizketakoa birritan igo behar izan zuten parte-hartzaileek.

Abiadura bizian jokatu zen lasterketa (irabazleak 45,4 kilometro orduko batez bestekoa lortu zuen), eta erasoak etengabeak izan ziren. Azken kilometroetara arte, ordea, ez zen ihesaldi onik sortu. Illart Zuazusbiskar izan zen tropela atzean uztea lortu zuen bakarra. Gaintxurizketa gainera iritsi aurretik erasoa jo zuen, eta 12 segundoko abantailarekin iritsi zen Gamon Zumardiko helmugara. Tropeleko sprintean onena Andoaingo taldeko Bengoetxea txirrindularia izan zen.

Gainontzeko sailkapenei dagokienez, taldekakoa Andoaingok irabazi zuen, eta herriko lehen sailkatua Bruesa taldeko Iker Puga izan zen. Pugak 21. postua lortu zuen helmugan.

Proba egin ahal izateko laguntza eman zuten herritar guztiei eskerrak eman nahi dizkie Laguntasuna Elkarteak: ohiko kolaboratzaileei, Udaltzaingoari, Babes Zibilari eta abar. Halaber, proba ikustera gerturatu ziren txirrindularitza zale guztien «portaera ona» eskertu nahi izan dute .