Oarsoaldeko Hitza

Xoxo-Lurra Eguna

Aurten lehen aldiz antolatu dute Xoxo-Lurra Eguna herriko hainbat elkartek Udalaren laguntzarekin batera. Etzidamu izango da aipatutako eguna, eta 10:00etan egin dute hitzordua Saldise plazan, Xoxo-Lurra deitzen den eremua auzolanean garbitzera joateko.

«Aurten ere, Jaizkibel mendiaren defentsan beste urrats bat eman nahi dugu zuen laguntza eta parte-hartzearekin. Horretarako, Xoxo-Lurra Eguna antolatzeari ekin diogu. Herritik gertu den paraje bat delako eta balore asko gordetzen dituelako», zehaztu dute antolatzaileek. Xoxo-Lurra herriko kaskotik oso hurbil dagoen eremua da (Ijurko auzo atzetik Bekoerreka jarraituz). Aipatutako eremua «utzita» eta «zaborrez beteta» dagoela adierazi dute antolatzaileek: «Gure proposamena elkarte eta herritarrekin zabor bilketa herrikoia egitea da, ondoren panel informatibo batzuk jartzeko bertan. Horretarako, etzidamu, 10:00etan Karlos Saldise plazan elkartuko gara».

Hein berean, herriko hainbat elkartetako kideek esan dute Udalak «prestutasuna» agertu duela zabor poltsak, eskularruak, tresneria eta zaborraren garraioa bere gain hartzeko. Dena den, herritarrek materiala badute eraman dezatela eskatu dute. Halaber, Udalak Xoxo-Lurra inguruan dauden txabolen jabeei natura «errespeta dezaten» eskatu diete, «beraiek baitira inguru hori gehien zikintzen dutenak».

Xoxo-lurraren balioa azpimarratuz

Antolatzaileek Xoxo-Lurraren inguruan aztarna etnografikoak daudela nabarmendu dute: Goikoerrotaren ur biltegiko horma, hiru karobi, hariztia, eta ur garbiko erreka, esaterako. «Xoxo-Lurrako ingurua zaborrez garbitu eta egokituko dugu herriko elkarteen artean antolatutako auzolanean. Honela, herritik gertu eta irisgarri dagoen hariztia eta erreka herritarren erabilpenerako mantentzea aldarrikatzen dugu, baita garai bateko karobiak errespetatzea ere».

Xoxo-Lurra eremua errespetatzeko eskatzeaz gain, superportuaren sarbideak aipatutako lekua «mehatxatzen» duela salatu nahi izan dute: «Herritarrei bizkarra emanik eta informazio ezarekin, Gipuzkoako Foru Aldundia idazten ari den proiektuan, Urrullotik barrena, Urdalamarta baserriaren ondotik, errepidea eta trenbide berria aurreikusten dira».

Horrez gain, Matxitxulo errekaren sorburuan Jaizkibelgo kostan dagoen Sanjuanarriraino 1.750 metroko tunela eraiki nahi dela esan dute: «Xoxo-Lurra bera ere arriskuan legoke Jaizkibia erakundearen planen arabera, bertatik sartu nahi dute Jaizkibel mendia zeharkatuko lukeen tuneletako bat. Errepidea eta trena itsaslabarretara sartzeko bi tunelez gain, larrialdietarako hirugarrena eraiki nahi omen dute».

Bestetik, Udalak adierazi du Jaurlaritzako Ingurumen Sailari «bere posizioa agertzea» eskatuko diola eta Aldundiko Lurralde Sailari «horrelako proiektuekin itsutu» ez dadila ere bai.