Oarsoaldeko Hitza

Oiartzungo Udaleko Euskara Zerbitzuak, Ttur-Ttur Euskaltzaleon Bilgunearekin elkarlanean, gurasoentzako kantu eta jolas tailerra antolatu du. Haurrei euskaraz jokoa erakustea izango da helburua; horregatik, gurasoei dago bideratua ikastaroa.

«Gure seme-alabak Nintendo eta Play Station bezalakoekin jolasten ikusten ditugunean, gure txikitako jolasak erakusten hasten gara. Batzuetan konturatu ere egin gabe, eta beste batzutan besterik ez dakigulako, jolas horien esaldi eta kantuak gazteleraz kantatzen ditugu», azaldu dute Udaletik. Esaldi eta kantu horiek euskaraz irakastea izango du xede ikastaroak.

Tailerren antolaketa praktikoa eta aurrera eramatearen ardura Ttur-Ttur Euskaltzaleon Bilgunearena izango da, irakasleak bertako kideak izango baitira.

Ekimena ez da berria. Duela bi urte Haurtzaro Ikastolan talde bat osatu zen, eta iaz bi talde: bat 3 urte arteko haurrak zituzten gurasoena, eta bestea, haur helduagoak dituzten gurasoena. «Esperientzia oso aberasgarria izan zen, eta parte-hartzaileak oso gustura gelditu ziren», azaldu dute Euskara Zerbitzuko ordezkariek. «Horren adibide da zenbait gurasoek errepikatu egiten dutela esperientzia», gaineratu dute.

Izen-ematea, datorren asteazkenera arte zabalik

Ikastaroan parte hartzeko interesa dutenek martxoaren 12ra arte dute izena emateko epea, Udaleko Euskara Zerbitzuan (943 493 842 telefonoan) edo Ttur-Ttur Euskaltzaleon Bilgunean (943 260 182). Horretarako, 0 eta 6 urte bitarteko haurren guraso izan beharko da, eta ikastaroan diren bitartean euskaraz hitz egin beharko dute. Saioak apirilaren 3tik ekainaren 13ra bitartean izango dira, ostegun eta ostiraletan, 15:00etatik 16:15era. Izen-emateak 20 euro balioko du, eta Udalaren zerbitzuetako tasak ordaintzeaz salbuetsita dauden familiak ikastaroa ordaintzeaz ere salbuetsita egongo dira.