Oarsoaldeko Hitza

Ateak zabaltzeko eguna izan zuten atzo Trintxerpeko Itsas Eskolan eta datorren ikasturtean izena emateko asmoa dutenek, instalakuntzak ezagutzeko aukera izan zuten

Gizonezkoak izaten dira gehienetan, beharrak bultzatuta etorritakoak batzuk, kuriositatez hurbildutakoak beste hainbat. Batzuk izena emango dute datorren ikasturterako, beste hainbat gogoarekin geratuko dira akaso.

Pasaiako Itsas Eskolan, ateak zabaltzeko eguna zuten atzo. Datorren ikasturterako ikasle berriak erakarri eta instalakuntzak ezagutzera emateko helburuz antolatu zuten jardunaldia. Honela, atzo arratsaldean instalakuntzak ezagutu nahi zutenek, eskolatik bisita gidatua egiteko aukera izan zuten.

Eskolarako garai berria

Itsasorako trebakuntzan espezialdutako eskola da Pasaiakoa, eta hala izango da aurrerantzean ere, baina lehengo urtarrilaz geroztik garai berri bat hasi du Itsas Eskolak. Izan ere, Itsasmendikoi sozietate publikoari esleitu baitiote.

Itsasmendikoi (IMK) Euskal Autonomi Erkidegoko landako eta itsasertzeko eremuen prestakuntza, sustapena eta garapena integratzeko zentroa da, eta bi helburu nagusi ditu: autonomi erkidegoan «lehen sektorea modernizatzea eta profesionalizatzea eta sektore horretako belaunaldi erreleboa bermatzea» batetik, eta bestetik, «lurralde oreka berraztertzea».

Honela, Pasaiako Arrantza Eskolaz gain, beste bost hezkuntza zentro dira IMKren baitakoak: Derioko lorezaintzarako eta baratzezaintzarako eskola, Arkauteko eskola, nekazariei eta landa eremuko biztanleei hasierako prestakuntza ematea helburu duena, Fraisoroko nekazaritza eskola, Arantzazuko artzain eskola, eta Biasteriko mahastizaintza eta ardogintza eskola.

Gipuzkoako bakarra

Pasaiakoa, Gipuzkoako Itsas Eskola bakarra da eta itsasoan, arrantza ontzietan zein merkantzia ontzietan lan egiteko behar diren titulu akademiko guztiak eskaintzen ditu, erdi eta goi mailako ziklo formatiboen bidez.

Historia luzea du eskolak. Aurrekaria Donostiako Arrantza Eskola izan zen, Gipuzkoako Ozeaografia Elkarteak sortu zuena 1912. urtean, Kaiko Marinelen San Pedro kaperako eskola-aretoan. Oinarrizko prestakuntza ematen zuten orduan, oso modu praktikoan.

1980 urtean, institutuak, gainerako zentro guztiek bezala, ikastetxe nazionalaren izendapena galdu zuen, eta bi urte geroago, Euskal Autonomia Erkidegoari esleitu zizkioten nabigazio eta arrantza alorretako irakaskuntzan Estatuak zituen eskumenak. Ikastetxearen izena aldatu zen orduan, eta Pasaiako Itsas Arrantzarako Lanbide Heziketako Ikastetxe Politekniko izena hartu zuen, iazko urtarrila arte. Orain, IMKren baitan, «nabigazio eta irakaskuntzako erronka berriei eraginkor erantzutea» da eskolaren helburua, «itsasaldeko ekintza-taldeak garatuz».