Oarsoaldeko Hitza

Atzo arratsaldean porturatuko zutela espero zen baina azkenean ezin izan dute. Harkaitzen kontrako kolpeak kalteak eragin zizkion herenegun gauean Jazkibelgo harkaitzetan hondartu zen Maro ontziari. Zamarik ez zuen ontziak, baina 54 tona gasolio eta 2,6 tona olio garraiatzen dituenez, oraingoz dagoen tokian uztea erabaki duten.

Baionatik irten eta Pasaiako portura zihoala, istripua izan zuen herenegungo 23:05ak inguruan Maro izeneko ontziak, Jaizkibel mendiko harkaitzen kontra, Turulla izenez ezagutzen den lurmuturrean.

Eskifaiak han eman zuen gaua., eta hasiera batean Maro ontziko kapitainak beharrezkoa ikusten ez zuen arren, 13:00etarako, berarekin batera ontzian zeuden marinelak, ukraniarrak guztiak, ontzitik atera zituzten, helikoptero baten laguntzaz. Hondarribiko aireportura eraman zituzten, guztiak onik.

Garraiatzeko modua aztertuz

Ontzian kapitaina geratu zen, teknikoekin, ontzia nola porturatuko zuten erabakitzeko. Ordurako istripuaren lekuan itsas salbamendurako hegazkina, salbamendu ontziak eta atoiontziak ikus zitezkeen. Atoiontzi bati lotuta dago atzoz geroztik Maro ontzia.

Oraindik ez dago argi istripua zerk eragin duen. Itsasoaren egoerak eragindakoa zela zabaldu zen atzo goizean, baina arratsaldean zabaldu zenez, ontziak matxura izan zuen makinetan eta horren ondorioz geratu zen harkaitz artean. Maro ontzia maiz etortzen da Pasaiako Portura eta ingurua ezagutzen du, beraz.

Harkaitzen kontra jotzean, ontziaren egituran zulo bat egin zen, eta olioa isuri egin du. Horregatik,. Eusko Jaurlaritzako ingurumen teknikariak istripuaren tokian izan ziren, salbamenduko taldeekin batera ontzia garraiatzeko modurik egokiena zein den aztertzen eta erabakitzen.

Salbamendurako kontingente handia

Atzo, egun osoan, salbamendurako kontingente handi bat aritu zen lanean ontziaren inguruan. Ontziak berak kontratatutako atoiontziekin batera, Alonso de Chaves atoiontzia Gijonetik etorri zen Pasaiara, Portuko atoiontziak baino potentzia handiago duelako eta batera lanean aritzeko.

Operazioan Salvamar Orion ontzia eta Helimer Cantabricohelikopteroa ari dira parte hartzen, baita Rosalia de Castro salbamendu hegazkina ere. Hegazkin horretan ekarri zituzten salbamendu lanetan parte hartzen ari diren A Coruñako Base Estrategikoko urpekariak ere.