Oarsoaldeko Hitza

Ehunka lagun elkarretaratu ziren atzo eguerdian Herriko Plazan, herenegungo Arrasateko atentatua salatzeko Errenteriako Udalak deituriko bilkuran. EAE-ANVk ez beste udal talde politiko guztiek parte hartu zuten protestan, Juan Carlos Merino alkatea buru zutela. Hain zuzen, ordu laurdeneko elkarretaratze ixila egin ondoren, alkateak berak Bozeramaileen Batzordeak adosturiko agiria irakurri zuen bildutakoen aurrean.

Kontzentrazioa baino lehenago bildu zen Bozeramaileen Batzordea, Isaias Carrasco Arrasateko PSE-EEko zinegotzi ohiaren heriotzaren aurkako adierazpena adosteko asmoz. Elkarretaratzean bezala, EAE-ANVk ez beste udal talde guztiek parte hartu zuten bileran, agiria aho batez onartuz.

Botoa emateko deia

Isaias Carrascoren senideei eta «oro har, euskal sozialista guztiei» elkartasuna agertu ondoren, ETAri disolba dadila eskatu dio agirian Udalak, «ziur gaudelako, eta haiek ere jakin badakitelako, ez dutela deus ere lortuko; samina eta tristura zabaltzea baino ez».

Era berean, «erahilketa honen alde edo kontra dagoen» argitzea eskatu dio ezker abertzaleari Udalak, «haien eskuak eta kontzientziak ere Isaiasen odolarekin zikinduta dauden» jakiteko. Izan ere, EAE-ANV ez beste udal talde politikoen esanetan, «ETAk eta hura sustengatzen dutenek, gaitzesten ez dutenek, nazkatuta gaituzte, nazka ematen digute, eta espero dugu Isaiasen hiltzaileak atxilotzea eta Justiziaren esku uztea».

Atzo onarturiko adierazpenean, halaber, alderdi politiko «demokratikoei» Udalak eskatu die «batasuna terrorismoaren kontra»; herritarrei, berriz, «elkartasun eta terrorismoaren kontrako deialdi oro» sustengatzea.

Gaurko hauteskundeetan botoa emateko deia ere egin du Errenteriako Udalak, «ETAri eta haren jarraitzaileei gizalege demokratikoaren bitartez erantzuteko».

Oiartzunen ere bai

EUDELen deiari jarraiki, Oiartzunen ere elkarretaratzea egin zuten atzo eguerdian. 40 bat lagun bildu ziren udaletxearen aurrean.

Oarsoaldeko Aralarrek ere gogor gaitzetsi du Isaias Carrascoren heriotza, ohar baten bidez, «gisa honetako hilketak guztiz deitoragarriak» zaizkiola azpimarratuz.

Batasunari «bide politikoen aldeko apustu irmoa egitea» eskatzearekin batera, gaur botoa ematera deitu du Aralarrek, «egiten den aukera politikoa edozein dela ere, heriotza honi euskal gizarteak eman diezaiokeen erantzunik onena» dela argudiatuta.