Oarsoaldeko Hitza

Espainiako Gorteetarako hauteskundeetan PSE-EE nabarmen gailendu da Oarsoaldean, bigarrenaren (EAJ) boto kopurua ia hirukoizteraino. 13.820 boto jaso ditu PSE-EEk, eta EAJk 4.597. Hirugarrena, PP, are urrunago gelditu da, 3.725 botorekin. Baina eskualdean emandako abstentzio tasa ere handia izan da: %56,81koa, hain zuzen. PSE-EE eta abstentzioa izan dira, hain zuzen, duela lau urteko hauteskundetatik hona igo diren bakarrak. Gainerako alderdiek boto gutxiago lortu dituzte, eta EAJ, EA eta EB-Berdeen kasuan jaitsiera nabarmena izan dute.

Herriz herri

Herriz herri, PSE-EE nagusitu da eskualdeko hiru herritan: Errenteria-Oreretan, Pasaian eta Lezon. Errenteria-Oreretan, esaterako, herenegun botoa ematera joan ziren guztietatik %53,46k PSE-EEren alde egin zuten, 9.478 boto jasoz. EAJ bigarren izan da herri honetan, 2.468 botorekin (%13,92).

Pasaian, halaber, erraz irabazi zuten herenegun PSE-EEkoek (3.000 boto; %47,84), bigarren izandako EAJri ia 2.000 boto atereaz (1.053 boto; %16,79).

Lezon, ordea, estuagoa izan da bien arteko aldea. PSE-EEk 765 boto jaso ditu (%41,61), eta EAJk 315 (%27,25). Hots, 166 botogatik gailendu da PSE-EE.

Oiartzunen, bien bitartean, EAJk irabazi du (761 boto; %31,07), eta PSE-EE bigarren izan da (577 boto; %23,56). Hau da, 184 botoko aldea lortu du alderdi jeltzaleak.

PSE igo PP jaitsi bezainbeste

Oarsoaldean, denera, ia 20 puntutan igo da PSE-EE: %19,85, hain zuzen. Bitxikeri gisa, ia-ia PP gure eskualdean jaitsi dituen puntu berdinak; Espainiako Estatuan ez bezala, alderdi popularrak orain lau urte baino boto gutxiago lortu dituelako Oarsoaldean: %19,37 gutxiago, zehazki.

Edonola ere, EB-Berdeak, EA eta EAJ izan dira, hurrenez hurren, gehien jaitsi direnak gure eskualdean. Duela lau urteko hauteskundeekin alderatuta, EB-Berdeek %50,57 boto gutxiago jaso dituzte; EAk, %50,39ko boto galera izan du; eta EAJk, %44,66koa.

Aralar alderdiak ere orain lau urte baino boto gutxiago jaso ditu, baina beherakada txikiagoarekin: %38,9koa, alegia.

Abstentzio altua

Abstentzioa izan da herenegungo hauteskundeetako beste protagonista nagusia Oarsoaldean, esan bezala, %56,81ko portzentaiarekin. Hau da, eskualdeko biztanleriaren erdiak baino gehiagok ez zuen botoa eman herenegun.

Orain lau urteko bozekin alderatuta, 25 puntutan igo da abstentzioa eskualdean, 2004ko hauteskundeetan abstentzioa %31,72koa izan baitzen. Euskal Herriko beste herri eta eskualdeetan bezala, ezker abertzaleak abstentzioaren alde egindako deia dago igoera horren atzean.

Hala, Gipuzkoak izan du abstentzio igoerarik handiena, baina herrialdeak izandako igoera nahiz portzentaia gainditu ditu Oarsoaldean emandako abstentzioak. Izan ere, abstentzioa 14 puntu handiagoa izan da Gipuzkoan, %41,82ko portzentaia lortuz.

Era berean, Gipuzkoako beste eskualde batzutan baino abstentzio handiagoa eman da gurean. Goierrin, esaterako, %42koa izan da abstentzioa, eta Tolosaldean %53koa.

Duela lau urteko hauteskundeekin alderatuta ez ezik, orain zortzi urteko hauteskundeetan baino handiagoa ere izan da abstentzioa Oarsoaldean. 2000ko Espainiako Gorteetarako hauteskundeetan, ezker abertzaleak abstentziorako deia egin zuen baita ere, eta Oarsoaldean %52,5ekoa izan zen orduan.

Herriz herri, Oiartzunek izan du abstentzio mailarik altuena, %68,46arekin. Ondoren, Lezo (%64,63), Pasaia (%50,5) eta Errenteria-Orereta (%43,59).

Bi diputatu eta senatari bat

Herenegungo emaitzak kontuan hartuz, datozen lau urteetan eskualdeko hiru herritar izango dira hautetsi Espainiako Gorteetan, hirurak PSE-EEkoak: Miguel Buen errenteriarrak eta Isabel Kortajarena antxotarrak diputatu eserlekua lortu dute Espainiako Kongresuan, eta Izaskun Gomez antxotarrak senatari kargua Senatuan.

Hiruretatik Kortajarenak bakarrik du eskarmentua Espainiako Gorteetan, aurreko legealdian ere diputatu izan baitzen Kongresuan. Buen eta Gomezen kasuan, estreinaldia izan go da Errenteriako eta Pasaiako alkate ohientzat.

Ertzaintzaren identifikazioak

Liskar handirik gabeko eguna izan zen herenegungoa eskualdean. Lezon, ordea, ezezagunek kateekin itxi zituzten Herri Eskolako ateak, eta ondorioz, kateak kendu arren, sarrera bakarra izan zuen eraikinak.

Ertzainen eta ezker abertzaleko jarraitzaileen artean ere izan ziren ika-mikak. Errenterian, adibidez, hauteskunde mahaietan Marko Demokratikorako Proposamenaren aleak banatzen ibilitako lagun ugari identifikatu zituzten ertzainek goizean. Arratsaldean, auto karabana egin zuten.

Oiartzunen ere auto karabanak egin zituzten goizean eta arratsaldean. Goizean, gidarietako batzuk identifikatu zituzten ertzainek.