Oarsoaldeko Hitza

III. Stockaren Azokako antolatzaileak «oso pozik» azaldu dira ekimenak izan duen erantzunarekin. 5.000 lagunek bisitatu dute asteburuan azoka, eta «aintzat hartzeko moduko kopurua» dela azpimarratu dute antolatzaileek. «Lehen bi urteetan jende gehixeago etorri zen, baina kopurua jaistea normala da. Egia esan, hasierako boom hori jaistea espero genuen, ez baitzen normala hainbeste jende etortzea. Horregatik, oso pozik gaude bildutako jendetzarekin. Eskualdeko ekitaldi gutxitan elkartzen dira 5.000 lagun», azaldu du Izaskun Calvo Errenkoalde Mertataritza Elkarteko kideak.

Azokan bildutako jende kopurua handia izan da, eta salmentak ere tamaina berekoak: «Azokan parte hartu duten merkatari guztiak gustura gelditu dira. Halaxe esan digute, behintzat. Jendea arropa begiratzera bakarrik sartuko ote zen beldurra genuen, baina ez da halakorik gertatu. Azokara joan den jende gehientsuenak erosi du zerbait».



Jose Luis Caso aretoan, gustura

Aurtengo azokaren berrikuntza bat kokalekua izan da. Estraineko aldiz egin dute azoka Jose Luis Caso aretoan, eta antolatzaileak «gustura» gelditu dira. Calvoren esanetan, «azoka egiteko leku aproposa da, erosoa eta handia».

Nolanahi ere, hotzarekin arazoak izan dituzte. «Aretoan ez dago berogailurik eta hotz handia pasatu dugu. Ea datorren urterako berogailua jartzen diguten!», eskatu du Calvok.



Zozketaren emaitzak

Stockaren Azokara joan ziren herritarren artean, Oiartzungo Elorsoro kiroldegian dauden termetarako hamar sarrera zozkatu zituzten antolatzaileek. Irabazleen zerrenda honako hau da: Rosa Barrio (Herrera); Sonia (Errenteria-Orereta);Yolanda (Errenteria-Orereta); Esperanza Lizarraga (Errenteria-Orereta); Victor Calvo (Pasai Antxo); Samuel Lazaro (Pasai Donibane); Rosi (Errenteria-Orereta); Garikoitz Barandiaran (Errenteria-Orereta); Monica Ruiz (Donostia); Leyre Entenza (Errenteria-Orereta).

Zozketako irabazleek Errenkoalde Merkataritza Elkarteko 943 514 553 edo 943 510 189 telefonoetara deitu behar dute sarrerak jasotzeko.