Oarsoaldeko Hitza

Gipuzkoako Foru Aldundiko Diputatuen Batzarrak otsailaren 19an hartu zuen Portuko Plan Berezia tramitatzeko erabakiaren kontra egiteko makinaria judiziala abian jarri du Udalak. Bi bide ditu zabalik. Batetik, atzo, udalbatzarrak berretsi zuen bidea dago: Aldundiak hartutako akordioaren kontra auzi-errekurtsoa jartzea. Bestea, dagoeneko zabalik dagoena, Aldundiak hartutako erabakia modu kautelarrean eteteko epaitegietan eginiko eskaera da. Aste honetan jakinaraziko du gaia hartu duen epaileak etete eskaera onartu edo ez.

Atzo goizean Antxoko Kultur Etxean egin zen ezohiko udalbatzarrean hartu zuten zinegotziek erabaki hau. EAE-ANVko zazpi zinegotzien onespena bakarrik jaso zuen neurriak, udalbatzarra hasi eta berehala oposizioko alderdiak, Isaias Carrasco Arrasateko PSE-EEko zinegotzi izandakoaren hilketa salatzeko udalbatzarrean ez parte hartzeko erabakia hartu zutelako, publiko artean jarriz.

Udalbatzarrak atzo hartutako bide judiziala, 781/1986 Legegintzako Errege Dekretuaren 54.3 artikuluan oinarritzen da. Bertan proposatzen da «administrazioarekiko auzi-errekurtsoa egikaritzea Udalari dagozkion eskumenen defentsan egindako ebazpenen aurka». Pasaiako Udalbatzak otsailaren 21ean onartutakoaren arabera, Aldundiak Plan Berezia tramitatzea onartu izanak «Udalaren eskumena usurpatzen du, eta Udalaren autonomiaren aurkako erabakia da».

Beste gaiak

Alkatearen gestio eta Goberno Organoen kontroleko atalean hainbat gairen berri eman zuen Maider Ziganda Pasaiako alkateak.

Hala, Donibaneko Bizkaia aldean eraikitzen ari diren gizarte-kultura-kirol azpiegituraren inguruan Udalak eta Aldundiak eraikin hori egiteko finantzaketa akordioa lortu dutela jakinarazi zuen alkateak. Aldundiak, ezohiko finantzaketen alorrean kontuan hartuko du Donibaneko eraikina.

Horrez gain, AZTIk, arrantzaleen lonjaren inguruko beharrak eta balizko kokapen berriaren inguruan Udalarekin bilera egin duela jakinarazi zuen atzoko udalbatzarrean Maider Zigandak.

Irakasleen Etxea

Karmengo Ama Ikastetxeko Irakasleen Etxearen inguruko berriak daudela ere aipatu zuen alkateak. Izan ere, udalbatzarrean onartu zen, egun bertan bizi direnek jabetza horrekiko eskubiderik balute, konponbiderako urratsak Jaurlaritzako Hezkuntza Sailak ematea. «Neurri hau ez zuen ondo ikusi Arantza Laka Hezkuntza Sailburuak. Hala ere, Jaurlaritzako zerbitzu juridikoek gaia aztertuko zutela esan zuen, eta gestio hau egina dagoela badakigu. Erantzunaren zain gaude», esan zuen Pasaiako alkateak. Gaia Jaurlaritzako Etxebizita Sailak bere gain hartuko duela iragarri zuten ere bai Jaularitzako iturrietatik.

Ziriza eta Nabalaldea

Azken egunetan bi gairen inguruan hitz egiteko bildu da Maider Ziganda Pasaiako alkatea Arantza Tapiarekin, Gipuzkoako Foru Aldundiko Lurralde Antolamendu eta Mugikortasun diputatuarekin. Zehatz mehatz, Ziriza Etxea eta Nabalaldea izan dira gaiak.

Nabalaldeari dagokionean, Udaleko Zerbitzu Saila La Herreratik Nabalaldeara tokiz aldatzeko proposamena egin zuen Udalak. Ziriza Etxearen gaiarekin, berriz, kultur azpiegitura bezala erabiltzeko beharrezko lanak egiteko nahia du Udalak. «Bi gaien inguruan hitz eginda», esan zuen atzo alkateak, «ez dugu jarrera egokirik topatu Arantza Tapiaren jokaeran. Bi gai horiek portuari dagozkiola esan zigun». Hala, Aldundiak portuan duen partaidetza zein den ikusita, gai hauen inguruan «ez duela nahikoa egiten» esan zuen Zigandak: «Dirudienez, gai hauek ez zaizkie guri iruditzen zaizkigun bezain garrantzitsuak iruditzen Aldundian».