Oarsoaldeko Hitza

Udaltzaingoaren egoitza berria inauguratu zuten atzo goizean, Masti-Loidi industria gunean. Juan Carlos Merino alkatea izan zen inaugurazioko plaka erakustearen arduraduna. Merinok azaldu zuenez, «Udaltzaingoaren egoitza berria punta-puntakoa da, eraikin modernoek dituzten ezaugarri guztiak ditu».

Merino alkateaz gain, Udalbatza osatzen duten alderdi guztietako ordezkariek hartu zuten parte atzoko inaugurazioan, baita Udaltzaingoaren arduradunek ere.

Egoitzaren ezaugarriak

Udaltzaingoaren egoitza berria Elecnor enpresako Jose Ignacio Iturbe arkitektoak egin du, eta 2.387.000 euroko aurrekontua izan du. 20 hilabete behar izan dituzte egoitza eraikitzeko eta atontzeko.

Udaltzainek Babes Zibileko langileekin konpartituko dute egoitza, baina espazio faltarik ez dute izango: 2.963 metro koadro ditu eraikinak.

Eraikinaren beste ezaugarri batzuk honako hauek dira: energia aurrezteko eguzki plakak, sorgailu elektrikoa, telebista zirkuitu itxia eta ateak irekitzeko txartel magnetikoak.

Hiru solairu

Udaltzaingoaren egoitza berriak hiru solairu ditu, eta solairu bakoitzak erabilpen «zehatza». «Eraikina ahalik eta hoberen antolatzen saiatu gara. Hartara, lanean hobeto koordinatu ahal izango gara», azpimarratu zuen udaltzainen buruak atzoko aurkezpenean.

Lehen solairuan, administrazio zerbitzua, herritarrentzako arreta zerbitzua, bide hezkuntza departamentua eta babes zibileko teknikariaren bulegoa jarri dituzte.

Bigarren solairuan, bulegoak, komunikazio zentroa, formakuntza gela, emergentzietarako gela, garajeak eta materiala gordetzeko gelak egin dituzte. Hirugarren eta azken solairuan, berriz, gimnasioa eta tiro galeria.

Behin betiko egoitza

Errenteria-Oreretako udaltzainek egoitza asko izan dituzte azken urteotan: udaletxean, Maria de Lezo kalean, Gecotorren... Masti-Loidiko egoitza berria, ordea, behin betiko egoitza izango dela azpimarratu zuen Juan Carlos Merino alkateak: «Udaltzainen egoera ez da oso erraza izan azken urteotan. Batetik bestera mugitu ditugu, eta ez dute behar bezalako egoitzarik izan. Egoitza berriak, ordea, lanerako behar dituzten baldintza guztiak betetzen ditu. Hartara, herritarrei ematen dieten zerbitzuaren kalitatea handitu ahal izango dute».