Oarsoaldeko Hitza

Hasi da denboraldia herriko zikloturistentzat. Giriziakoak zein Lartaungoak pedalei ematen hasi dira dagoeneko.

Martxoaren lehenengo igandean hasi zen denboraldia. Urrira arte, igandero egingo dituzte irteerak, bat bera huts egin gabe. Lartaungoek, jai egunetan ere antolatu dituzte irteerak.

«Sekula baino gehiago»

Giriziakoen lehenengo irteeran herritik Lesakara joan ziren eta Agiña eta Aritxulegitik barrena eman zuten itzulia.

Hala ere, denboraldiari hasiera emateko, Petritegi sagardotegian bazkalduz biribildu zuten. Bigarren irteera Zarautzera egin zuten, joan den igandean.

Aurten, sekula baino gehiago direla dio Joxan Mitxelenak: «Lehenengo irteeran 15 bat txirrindulari bildu ginen. Gazteak hasi dira irteeretan parte hartzen, sukarrak emanda, eta hori seinale ona da, taldea indarberritzen du eta».

Giriziak, arropa berria

Aurten, gainera, arropa berriak estreinatu dituzte Giriziako zikloturistek. «Hiruzpalau urtetik behin berritzen dugu gure arropa», azaldu du Mitxelenak. «Oiartzungo koloreak errespetatzen eta mantentzen ditugu, baina beti ere pixka bat modernizatuz».

Orain arte mauka motzeko kamisetarekin ibili dira Giriziako zikloturistak, eta oraingoan, luzea izango dute.

80 bat lizentzia tramitatuko ditu Lartaunek aurten

Lartaungo zikloturistek ere indartsu hasi dute denboraldia. Lehen irteerak, Azkainera eta Oriora egin dituzte.

Oraindik lizentziak tramitatzen ari dira, «80 bat zikloturista izango gara», kontatu du BibianoArbelaitzek.

Irteera bereziak

Lartaunek ere irteera bereziak antolatzen ditu denboraldian. Iaz, Lerinera joan ziren txirrindaz eta bertako upeldegi batean bazkaldu zuten. «Euskal Herriko Itzulia antolatzen aritu ginen iaz, eta aurreko urtean Leringo zikloturistak aritu ziren. Badugu harremana eurekin eta hara egin genuen irteera».

Iaz galdu zuten ekimen bat ere berreskuratuko dute aurten: asteburupasa egingo dute uztailean, Urbasa edo Otxagabia aldera.

«Larunbatean txirrindaz joan, arratsaldea lagunartean pasatu eta igandean itzuliko gara. Urtetako ohitura izan da bidaia hau egitea eta giro polita izaten da», kontatu du Arbelaitzek. Pozik daudela berriz ekimena egingo dutelako.