Oarsoaldeko Hitza

Añarbeko Uren Mankomunitateak atzo jakinarazi zuenez, Txingurri errekastoko ur zikinak ez dira aurrerantzean Pasaiako badiara isuriko. La Herrera aldean joaten ziren Donostiatik datorren errekastoaren isurketak badiara, eta azken urteetan egin dituzten lanen ondorioz, atzo esandakoen arabera, errekasto hori birgaitu dute, eta orain arte badiara joaten ziren ur zikinak, aurrerantzean Donostiako Loiola auzoko araztegira joango dira.

Ur horiek Loiola aldera joan daitezen La Herrera aldean zegoen ponpalekua berritu zuen iaz Añarbeko Urak Mankomunitateak. Horrez gain, aurten, ponpaketa estazio horren kanpoaldeko itxura aldatu dute. Gainera, Donostiako hainbat tokitatik La Herreraraino joaten ziren ur beltzak desbideratu dituzte. Aurretik, San Pedron, Lezon, eta Errenteria-Oreretan kolektoreak egin ziren, baita San Markoko zabortegitik Molinao errekastora zihoazen urak garbitzeko araztegia ere. 1996an hasi zituzten lan hauek guztiak, eta Donibaneko saneamendua bukatzen dutenean bukatutzat emango dituzte, 2010ean hain zuzen.

44 milioitik gora

Añarbeko Urak Mankomunitatetik jakinarazi dutenez, 44.521.258 euroko aurrekontua izan dute Pasaiako badiara ur zikinak ez isurtzeko egin diren lan horiek guztiek. Atzo bukatutzat eman zuten Txingurri errekastoaren uren birkokatzea izan da lan horietako azkena.

1996an hasi zituen Añarbeko Uren Mankomunitateak badiara ur zikinik ez isurtzeko beharrezkoak ziren lanak. Mankomunitatekoek egin dituzten ikerketen arabera, ordudanik egindako lan guztiei esker 71.000.000 kilo solido ikusezin ez dira isuri Pasaiako badiara.

Hondakin urei dagokionean, Añarbeko Uren Mankomunitateak esan du 181.000.000 metro kubiko isurtzea saihestu dutela lan horiekin guztiekin; hau da, Añar beko urtegia adinako bost ez dira isuri Pasaiako badiara, ur zikin moduan. «Onura itzela ekarri diote lan hauek guztiek Pasaiako badiako uraren egoera ekologiokoari», esan dute Añarbeko Uren Mankomunitatetik.

Donibane eta Marealta

Badiara ur zikin gehiago ez isurtzeko, bi lan dituzte esku artean. Batetik, Antxon, portura begira Marealtaren ezkerraldetik doan saneamenduko ubidea konpontzen ari dira. Ubide hori zaharkitua zegoen, eta ur zikinak gaizki iragazteaz gain, euri asko egiten zuenean uholdeak izaten ziren, itsasgora zegoenean batik bat. Hormigoi armatuarekin babesten ari dira lurrazpiko ubidea, Marealtako urak ubidera ez joateko. Uztailean bukatuko dituzte lanak.

Bestalde, 2009-2010 epean Donibaneko kasko historikoko ur zikinak berbideratzeko lanak egingo ditu Añarbeko Mankomunitateak, Uraren Euskal Agentziarekin batera. 4.000.000 euroko aurrekontua dute lanek, eta egitasmoa ekaina baino lehen idatziko dute.