Oarsoaldeko Hitza

Udako Euskal Unibertsitateko (UEU) Arkitektura Sailak Pasaia Hirigintza Mintegia antolatu du apirilerako. Zehatz mehatz, apirileko ostiral, larunbat eta igandetan hitzaldiak, lan-tailerrak eta ibilbideak prestatu dituzte helburu nagusi jakin batekin: Pasaialdean proiektuan dauden hirigintza eta azpiegitura egitasmoen ikuspegi kritikoa lantzea, eta bide berriak proposatzea. Trintxerpeko Alkateordetzan egingo dira Mintegiaren baitako hitzaldiak eta lan-tailerrak.

UEUtik jakinarazi dutenez, arkitektura, hirigintza zein landagunengintza alorretan interesa duen jendearentzako dago bideratua Pasaia Hirigintza Mintegia. Hartara, ordenagailu bitartez marrazkiak egiteko gaitasuna duen jendea izatea gomendatu dute ekimenaren sustatzaileek. «Proposamenak egiteko iniziatibadun jendea izatea ere interesgarria litzateke», esan dute UEUko kideek.

Mintegiaren prezioa 240 eurokoa da (bazkideentzako 200 euro), eta izena martxoaren 31 baino lehenago eman beharko da. Matrikula www.ueu.org webgunearen bitartez egin behar da. Informazio gehiago nahi duenak, 629 482 474 telefonora dei dezake. Gehienez, 30 parte-hartzaile onartuko dira, matrikulazio dataren arabera.

Bi zatitan

Udako Euskal Unibertsitateko kideek bi zati nagusitan banatu dute Pasaia Hirigintza Mintegia. Lehenean, eskualdearen eta Pasaiaren egungo egoeraren azterketa egingo da. Horretarako, azken urteotako antolamendu proiektuen bilakaera aztertuko dute Mintegian izena emango dutenek. Parte hartzaileen artean azpitaldeak osatuko dira horretarako, «azaldu nahi diren proposamenak ugariak izan nahi dutelako» esan dute UEUtik. Hirigintza, landagunegintza eta azpiegituren erradiografia zehatza egingo da.

Bigarren zatian, berriz, azterketa zehatzak eginda, proposamenak eta egitasmoak lantzeko txanda iritsiko da. Azterketetan nabaritutako gabeziak eta aukerak esku artean izanda egingo dute hori.

Balio akademikoa

Udako Euskal Uniubertsitatetik jakinarazi dutenez, Mintegia bukatzerakoan ziurtagiria banatuko zaie parte-hartzaileei. Bertan jasoko den balio akademikoa 50 ordukoa izango da. Parte hartuko dutenak Euskal Herriko Unibertsitateko ikasleak badira, kreditu askeak lortzeko aukera dute.