Oarsoaldeko Hitza

Berdintasun politikaren aldeko hautua egin du Oiartzungo Udalak, eta horretarako, pausoak ematen ere hasi da. Urtarriletik, Berdintasunerako teknikariak lan egiten du Udalean, eta orain, herriko diagnostikoa osatzeko aurrepausoak ematen ari dira.

Berdintasunerako zinegotzia da Arantza Arrese. «Konpromisoa eta borondate politikoa dugu gai honen inguruan herrian sortzen diren beharrak aurrera eramateko».

Behin diagnostikoa osatuta, «plangintza egoki bat egin eta martxan jartzea, arloz arlokoa» dela Udalaren helburua ere azaldu du Arresek.

Beste herrietako eredua

Oiartzunek Berdintasun planak dagoeneko martxan dauden herrietatik hartu du eredua: Arrasate, Hernani... Herri haietako arduradunekin harreman zuzena izan dute. Arrasatekoak, herrira bertara etorri ziren.

«Arrasaten, adibidez, 12 urte daramatzate eta aldea nabarmena da, izugarrizko antolamendua dute», esan du Arresek.

Clara Wolfram teknikaria da herriko arlo guztietan berdintasun diagnostikoa osatzen. «Berdintasun politika ezartzea Udal batean generoa zer den eta genero perspektiba ezartzea jarduera guztietan», dio teknikariak.

Oiartzunen, lehen aldiz egingo da gisa honetako lana.

Diagnostikoaren aurretik, «sentsibilizazioa»

Herriko bi ikastetxeak dira lan lerroetako bat. Elizalde Institutuko ikasleekin joan den astean generoa aztertzen eta berdintasun ginkana egiten aritu ziren. Apiriletik aurrera, bi ikastetxeekin lanean segituko dute.

«Diagnostikoa osatu aurretik, interesgarria da sentsibilizazio eta formakuntza ekintzak antolatzea» azaldu du Wolframek. «Diagnostikoak herrian generoaren inguruan dagoen errealitatea islatu behar du, berdintasun erako hutsuneak detektatu behar dira». Hori guztia egiteko, gizarte eragileen laguntza «ezinbestekoa» dela aitortu du Wolframek.

Aurrera begira ere, ikastaroak eta abar antolatzea da asmoa, herriko kulturgintzan edo kirol arloan dabiltzan eragileekin.

Udalean bertan, plana martxan jarriko dute. Apirilean, dagoeneko udal teknikariekin ikastaroak egingo dituzte.

Herritarrekin harremana

Berdintasunaren inguruan herriko egoera «uste baino gogorragoa» dela diote teknikariak eta zinegotziak. «Kezka genuen Udal gobernu gisa, berdintasunaren inguruan zein behar zeuden jakin behar genuela uste genuen», azaldu du Arresek.

Horregatik, berdintasunaren inguruan arazoak, proposamenak edota kezkak dituen edozein herritarri eurengana jotzeko dudarik ez egiteko ere esan diote.

Berdintasunerako teknikaria asteartetik ostegunera dago Udalean, 09:30etik 14:00etara. Udalera deitu eta bietako edozeinen galdera egitea nahikoa dela azaldu dute.

«Ilusioz»

«Lehenengo pausoa eman dugu, baina hurrengoak bata bestearen ondoren etorriko dira», dio Wolframek.

«Ilusioz ari gara lan honetan. Oraindik gauza asko daude egiteko eta behar bezala egiten saiatuko gara», gehitu du Arresek.