Oarsoaldeko Hitza

Bi urtetik behin egiten da Gazte Topagunea Euskal Herrian, eta aurtengo aldia Lezon izango da. Etzi hasi eta datorren astelehenera arte, Euskal Herri osotik etorritako milaka gazteren topagunea bihurtuko da Lezo.

Aurtengo Gazte Topaguneak zortzi gune ezberdin izango ditu. Lehena, Herri Gunea, Lezoko erdigunean bertan kokatuta: lau egunez iraunkorki, Komunikazio Txokoa, Kamaradak Txokoa, Informazio Gunea, dendak, Osasun Gunea eta azoka izango dira bertan.

Bigarrena Akeita eta Jantoki Gunea izango da, Bekoerrota kiroldegi ondoan; 09:00etatik aurrera zabalik izango da, gosariak, bazkariak eta bokatak emateko.

Musika Gunea, jendetsuena

Hirugarren gunea, berriz, Kultur Gunea deiturikoa, Bekoerrota kiroldegiaren ondoan kokatuta.

Laugarren eremua, ordea, Eskola Guneak, Jaizkibel Azpi Herri Eskolaren eraikina izango du leku. Bosgarrena Musika Gunea izango da, Altamiratik gora, eta seigarrena Auditoriuma, Gezalan.

Zazpigarren eremuak Akeita+Jantokia Gunea izena du, Bekoerrotan kokaturikoa. Eta zortzigarren gunea txosnek osatzen dute, Goiko Plazan atondurikoak.

Zortzi gune horiez gain, dutxetarako eremua prestatu dute herriko igerilekuan, eta kanpalekua Altamirako gainan.

Dena den, Musika Gunea izango da jendetzarik handiena jasoko duen eremua. Egunero kontzertu handiez gozatzeko aukera ezin hobea eskainiko du Musika Guneak: Latzen, Etsaiak, Xikinkei, Anestesia, Sorkun & Vice Presindetes, Etam, Hesian, Banda Bassoti, Katamalo edota Desoreka bezalako taldeak izango dira gozagarri.

«Lezo ezagutzera emateko»

Abenduaz geroztik antolaketa lanetan aritu da herritar ugari; tartean, Beñat Salaberria eta Garikoitz Zabaleta gazteak. Azken egunotan, muntai lanetan aritu dira, baita Herriondo bailaran egokituko diren kanpalekua eta Musika Gunea prestatzen ere.

«Lezorentzako berriz ere pasatuko ez den zerbait da. Lezo herri txikia da eta ez du jende askok ezagutzen. Donostiako jende askok ez daki non dagoen, baina gertu gaude. Aukera bat da Lezorentzako. Bizia emango dio Lezori», azaldu diote OARSOALDEKO HITZAri Lezoko bi gazte hauek.

Topagunera jende asko etorriko dela nabarmentzeaz gain, herriko festetara ere jendea etorrarazteko bidea egiten ari direla ere azpimarratu dute. «Topagunea ez da soilik festa. Gazte mugimendua islatzen duen ekitaldi bat da. Bertan ikus daiteke euskal gazteria zenbat mugitzen den, zein kultura dugun...», adierazi dute bi antolatzaileek. Hala ere, gogorarazi nahi izan dute Gazte Topagunea ez dela gazteei bideratutako ekimen hutsa, haurrentzako nahiz helduagoentzako ekimenak ere egongo baitira Gazte Topagunean.

Beñat Salaberriak eta Garikoitz Zabaletak lau egunetan gau eta egun aritu beharko dute lanean, orain arte prestatutakoa behar bezala atera dadin. «Gu walkie-kin gora eta behera ibili beharko duten horietakoak izango gara. Eguneko 24 ordutan prest egon beharko garenak, arazorik egon ez dadin».

Komunikazioa, protagonistetako bat

Lau egunetan egingo diren ehunka jardueren artean, gazteek egindako eta gazteentzako sortutako komunikazio era ezberdinek protagonismoa hartuko dute Topagunean, Herri Gunean izango den Komunikazio Txokoan. Txoko honetan bertan erredakzio moduko bat prestatuko dute, arlo honetan interesa duten gazte guztiei ateak zabalduz.

Komunikazio arloan parte hartzeko aukera izateaz gain, hainbat hedabidek jaialdiaren jarraipen berezia egingo dute Gazte Topaguneak iraun bitartean. Esaterako, Xirika gazte kazeta Topaguneko egunkaria bihurtuko da, eta Gara egunkariarekin batera argitaratuko da, gehigarri gisa.

Horrez gain, Herri Gunean, Irauli Uhinak Irratiko saioa izango da egunero, kanpalekuan ere entzun ahal izango dena. Dena den, ez da jaialdi erraldoi honetan entzun ahal izango den irratsaio bakarra; izan ere, beste hainbat irrati librek programazioaren osaketan parte hartuko baitute.

Topaketa internazionalistak

Baina Herri Gunean, Komunikazio Txokoa izateaz gain, Kamaradak Txokoa ere atonduko dute, non Topaketa Internazionalistak egingo diren. «Topaketa hauen helburua da nazioartean gazte mugimenduek eta eragileek bizi duten egoera Euskal Herriratzea batetik, eta eragile hauei gaur egun Euskal Herriko gazte mugimenduak bizi duen egoera aurkeztea bestetik», azpimarratu dute Gazte Topaguneko antolakuntzatik.

Bost gairi buruzko eztabaidak egingo dituzte bertan, hezkuntzak ere garrantzia handia duelako Topagunean: Europako eraikuntza eta herriak; Antiglobalizazio mugimenduak; Lege antiterroristak eta gizarte mugimenduak; Herri proiektuak eta makro proiektuak; eta Internazionalismoa.

Kamaradak Txokoan, gainera, hogeitik gorako herrialdetako ordezkariak elkartuko dira; Hegoafrika, Venezuela, Irlanda edota Palestinatik etorritakoak, besteak beste.

 

Oiartzungo Gazte Topagunea, aurrekaria

Gazteria

Duela hamar urte Gazte Topagunea Oarsoaldean egin zen baita ere, Oiartzunen, 20.000 bat gazte elkartuz

iban iza

Gazte Topagunea lehen aldiz egingo da Lezon, baina ez da Oarsoaldean egiten den estreinako aldia. Izan ere, orain hamar urte ere milaka gazte bildu ziren gure eskualdean, Oiartzunen egindako Gazte Topagunean.

Eta Lezon bezala, ez ziren gutxi izan Oiartzungo Gazte Topagunearen prestakuntzan lan egin zuten oiartzuarrak eta, oro har, eskualdeko herritarrak.

«Duela hamar urteko Topagune hartaz ezer azpimarratzekotan, jendearen lanerako gogoa eta ilusioa nabarmenduko genuke», azpimarratu diote OARSOALDEKO HITZAri lanean aritu ziren gazte oiartzuar batzuek. «Aldez aurretik herriko nahiz eskualdeko gazte ugarik egin zuen lan ikaragarria, ez zen nolanahikoa izan: herriko lur jabeekin egon, bazterrak txukundu, txosnak montatu, argi-indarra eta ura banatu, herriko dendariekin eta tabernariekin egon...», gogorarazi dute.

«Oiartzungo Udalaren laguntza ere ez zen txikia izan; behar zen laguntza eta azpiegitura guztiak jarri zituzten antolatzaileen esku. Honela lortu zen Gazte Topagunerako guztia prest edukitzea», nabarmendu du lanean jardun zuen gazteetako batek.

«Ilusioa eta gogoa»

Baina jendearen ilusio eta gogo horiek «batez ere» Gazte Topagunea iritsi zenean ikusi ziren, antolakuntzan aritu ziren oiartzuar hauen esanetan. Izan ere, «izugarrizko eguraldi txarra eta herri guztia inguratu zuten guardia zibilen gainetik, 20.000 gazte etorri baitziren Oiartzunera, Independentzia lelopean biltzeko asmoz», gogorarazi dute.

Topaguneak iraun zuen bitartean jendearen portaera ere eredugarria izan zela dute gogoan, «baita oiartzuarrena ere, garbi ikusi baitzuten bertan bildutako gazte independentisten zintzotasuna, herri hau iraultzeko asmoa eta gaitasuna».

«Gustura egindako lana»

Gazte Topagunea bezalako ekimen edo jaialdi erraldoiek lan handia eskatzen dute aurretik, baina baita ondorengo egunetan eta asteetan ere. Oiartzungo gazte hauen esanetan, «ondorenean ere lan asko egin zen dena lehen bezala uzteko. Baina Topagunearen arrakasta ikusita, gustura egindako lan bat izan zen».

Azpimarratzekoa da, halaber, duela 10 urteko Gazte Topagune hartako kanta Alaitz eta Maider oiartzuarrek egin zutela. Aurtengo Topaguneko abestia Sakanako Hesian taldearena da, baina letra Alaia Martin oiartzuarrak egin du.

 

Jasotako erantzunak:

Mezua idatzi

Parte hartu | Zure mezua bidali

Izena:

e-posta:

Izenburua:

Mezua:

Aurreko kodea kopiatu:

Parte hartzeko arauak

1. 1. - Saiatu zure artikuluak izen-abizenekin sinatzen. Indar handiagoa du.
2. 2. - Iritzia anonimoki eman nahi baduzu, baduzu horretarako aukera ere. Kontuan hartu ondokoak:
   * Ez pertsonala. Pertsona bati buruz ari garenean zehazki, kritikatzeko edo famatzeko, anonimoek ez dute balio. Eta, kasu honetan, pertsona fisikoez ari gara, ez entitate juridikoez.
   * Entitate juridikoez anonimoki aritu daiteke, baina pertsonalizatu gabe, eta talante eta errespetu onean; iraindu gabe, doako akusaziorik egin gabe... errespetuan.
   * Aurreko gauza bera gai orokorrez idatzi behar denean ere.
   * Norbaitek pertsonalki sinatutako iritzi bati, pertsonalki erantzutea dagokio, eta ez anonimoki.
3. 3. - Dena arautzea ezinezkoa da, batez ere hau bezalako webgune batean. Mesedez, denon zentzu ona eta kolaborazioa eskatzen ditugu. Apenas izango den logika bezalako arautzaile zuzenik kasu hauetan.