Oarsoaldeko Hitza

Eguraldiak ez zien gehiegi lagundu, baina primerako giroan pasatu zuten herenegun Jaizkibel Mendi Taldeko kideek antolatutako Sagardo Eguna. Urtero legez, mendi ibilaldia eta festa uztartu zituzten, herenegun, elkarteko bazkideen gozamenerako.

Berrogeita hamar lagun inguru bildu ziren, lehenbizi eskualdean barrena mendi buelta egiteko, eta ondoren, Ugaldetxoko Aristizabal sagardotegian bazkaltzeko.

Urteroko hitzordua pasatuta, datorren igandean berriro ere bilduko dira Jaizkibelgoak, oraingoan Gorbeara joateko. Mendi Turutarietatik egiten ari diren biraren baitako laugarren irteera izango da igandekoa. Antxotik 07:00etan irtengo dira, eta ordu laurden lehenago Errenteria-Oreretako Iztietako autobus geltokitik. Ibilaldiari Urigoitin ekingo diote, eta Gorbeara igo ondoren Barazarretik hartuko dute autobuserako bidea.

Interesatuek badute oraindik izena ematerik, gaur ala etzi, iluntzetan, elkartearen egoitzan.

Naturan jasotako erretratuak

Jaizkibelek prest du jada hil honen bukaerarako antolatu duen Mendi Astea. Hilaren 21etik 25era izango da, baina astearen atarirako, ekimen berri bat antolatu du Jaizkibelek aurten: Naturari Buruzko I. Argazki Lehiaketa Digitala.

Lehiaketarako izena ematen duten argazkilariek eta zaleek, hilaren 20an, igandearekin, Jaizkibelen barrena ibili beharko dute argazkiak egiten, horixe baita antolakuntzak ezarritako eremua; «Jaizkibel mendia Hondarribia eta Donibane artean». Horrez gain, Antxoko barrutian atera ahal izango dira erretratuak baita ere, «Antxo eta bere herritarrak» izenpean bilduko dituzten argazkietarako.

Parte-hartzaile bakoitzak, gehienez, sei argazki aurkeztu ahal izango ditu lehiaketara, ondoren zehazten diren sailetarako: «Paisaia, fauna, flora, ura, zuhaitzak, eta Antxo eta bere herritarrak». Antolakuntzak hiru sari banatuko ditu, eta irabazleak bi lagunentzako bazkaria irabaziko du Donibaneko Camara jatetxean.

Astebeteko epea izena emateko

Argazki leihaketan izena eman nahi dutenek, hilaren 15era arteko epea dute, eta bi modutan gauzatu dezakete izen-ematea: ondoren zehazten diren bi telefono zenbakietara deituta -629 817 553 edota 669 651 095- edo posta eletroniko bidez, iijaizkibelmendi@euskalnet.netii helbidera idatzita. Izena emateko orduan, izena, abizena, adina, helbidea, telefono zenbakia eta posta elektronikoko helbidea adierazi behar dira.