Oarsoaldeko Hitza

Etzi hasiko da Udako Euskal Unibertsitateko (UEU) Arkitektura Sailak Pasaiako Hirigintzari buruz antolatutako mintegia. Trintxerpeko Alkateordetzan izango dira saioak, apirila bukatu bitartean, asteburuetan.

Ostiraletan gaiari buruzko hitzaldiak izango dira, gaian adituek eskainitakoak. Larunbatetan, lan tailerrak egingo dituzte mintegiko partaideek, taldeka, eta igandeetan irteerak eskualdean zehar.

Aztertu, proposatu eta alderatu

UEUko Arkitektura Sailaren ustez, «Europako garraio ardatz nagusietako bat eskualdetik igarotzeak aldaketa ugari» eragingo ditu Pasaiako badiaren inguruan. Horregatik garrantzitsua iritzi diote «Pasaialdean proiektuan dauden hirigintza eta azpiegitura egitasmoen inguruan ikuspegi kritikoa lantzeari eta bide berriak proposatzeari», eta horixe izango da, hain zuzen, mintegiaren helburu nagusia.

Horretarako, mintegian izena ematen dutenek, eskualdearen azterketa egingo dute lehenik eta behin, gerora proposamenak eta proiektuak egin, eta aldez aurretik landu dituztenekin alderatzeko.

Balio akademikoa

Mintegia doan da, eta oraindik ere bada izena ematerik. Balio akademikoa ere izango du mintegiak, jasoko duten guztiei ziurtagiri bana emango baitiete ikastaroa bukatutakoan.

Ziurtagirian jasoko den mintegiaren balio akademikoa 50 ordukoa izango da eta EHUko kreditu askeak lortzeko baliagarria da. Kredituak nahi dituztenek, asistentzia derrigorrezkoa izango dute, baina ez gainontzekoek.

Matrikula www.ueu.org helbidean egin daiteke.