Oarsoaldeko Hitza

Oskorri musika talde ezagunak eta Errenteriako Musika Bandak kontzertua eskainiko dute elkarrekin apirilaren 13an, 19:00etan, Galtzarabordako kiroldegian. Oskorri Band Band saioa eskainiko dute bi musika taldeek. Furra furra, Desertore, Gu gaituzu Oskorri... bezalako kantu ezagunak entzuteko aukera izango da.

Kontzertu berezia izango da, Errenteriako Musika Banda ohiko errepertoriotik aterako baita. «Ohiko pasadoble, zarzuela, eta abar alde batera utziko ditugu, Oskorriren kantu mitikoak jotzeko», azaldu du Aitor Mitxelena bandako zuzendariak. «Taldekideoi poz berezia ematen digu Oskorrirekin jotzeak», gaineratu du Mitxelenak.

Oskorrik Bilboko Musika Bandarekin Band Band ikuskizuna eta diskoa kaleratu zituen, eta berau du abiapuntutzat Oskorri taldeak emanaldi berri honetan. «Herri ezberdinetako musika bandei hots egin diete interesa duten galdetuz. Guri deitzerakoan Kultura sailaren oniritzia jasotzerakoan baietza eman genien», azaldu du Mitxelenak.

Duela bi aste eman zuten azken kontzertua Errenteriako Musika Bandakoek, eta orduz geroztik buru-belarri ari dira entseatzen. «Erritmo onean ari gara entseatzen. Hala ere, Oskorriko musikaririk gabe huts samarra gelditzen da. Asteartean, gurekin entseatzera etorriko dira Oskorrikoak, eta orduan ikusiko da ondo ari garen edo ez», azaldu du bandako zuzendariak. Sarrerak astelehenetik aurrera egongo dira salgai 10 eurotan Errenteria Hiria Kulturgunean eta Galtzarabordako kiroldegian.