Oarsoaldeko Hitza

Instep taldeak joan den astean bi kanta grabatu zituen Garate estudioetan, Donostiako Piraten I. Musika Lehiaketa irabazteagatik.

Ia-ia, Andoaingo Garate estudioetan egin dute bizitza joan den astean Instep taldeko sei kideek.

Donostiako Piratek antolatutako I. Musika Lehiaketa irabazita, bi kantako single baten grabaketa egiteko saria irabazi zuten Garate estudio sonatuetan, Kaki Arkarazorekin.

Ekain Perez, Eneko Lusar, Aitzol Silicio, Ander Lizaso, Iñigo Goñi eta Mikel Alonso «oso pozik» daude emaitzarekin.

Bi kantako singlea

Bi kanta grabatu ditu Garate estudioetan seikoteak: First smile of they eta Four leaf clover, berri-berriak. «Orain arte egin ditugun grabaketak etxekoagoak izan dira», azaldu du Iñigo Goñi taldeko bateriajoleak. «Lehenengo aldia izan da benetako estudio batean sartu garena, eta esperientzia izugarria izan da».

Instepek Garaten euren eskura izan duen material «mordoa» aipatu du. Egunean hamar ordu baino gehiagoko saioak egin dituzte grabaketek iraun duten sei egunetan. «Hori bi kanta grabatzeko, pentsa!», dio Goñik.

Produkzioa taldearen eta Martxel Arkarazoren artean egin dute. Hau izan da grabaketak egin dituena ere bai.

Promoziorako tresna

Grabatu dituzten bi kantak taldea promozionatzeko erabiliko ditu Instep taldeak. Interneten zintzilikatu, disketxeetara eta jaialdietara bidali...

«Urte bukaeran edo datorrenaren hasieran gure lehenengo diskoa grabatu nahi dugu», azaldu du Goñik, «bi kanta hauek aperitibo bat dira». Dagoeneko, «bete-betean» euren lehen diskoa izango dena prestatzen ari direla aitortu dute taldekideek.

Astelehenetik ostegunera, musika grabatzen aritu ziren. Azkeneko bi egunetan, ostiralean eta larunbatean, nahasketak eta masterizazioak egiten aritu ziren Kaki eta Martxel Arkarazorekin.

Gau Piratan, Berri Txarrak-ekin

Baina Donostiako Piraten I. Musika Lehiaketa irabazita, ez dute sari bakarra izan Instepeko musikariek.

Iazko Donostiako Aste Nagusiaren bezperan, Gau Piratako kontzertuan parte hartu zuten Trinitate enparantzan, Berri Txarrak eta Etsaiak taldeekin batera.

«Izugarria izan zen», aitortu du Goñik, «uste genuen oholtzara aterako zen lehenengo taldea izanik, jende gutxi egongo zela, baina plaza beteta zegoen!».

Eurak gustura geratu ziren kontzertuan egindakoarekin, «eta jendea ere bai, esan zigutenaren baitan», gehitu du Goñik.

Ziurrenik, Berri Txarrak-ekin jotzeko aukera izan duen Oiartzungo musika talde bakarra izango da Instep.