Oarsoaldeko Hitza

Udalak eta Haurtzaro Ikastolak 2011ra arteko hitzarmena sinatu berri dute. Bi aldeak «oso gustura» daudela hitzarmenarekin adierazi dute.

Udalak azaldu duenez «ezinbestekoak dira herrian dauden bi hezkuntza proiektuak, eta horregatik, biei antzeko trataera emateko asmoa dugu».

Lanetarako laguntza

Aitor Etxeberria alkateak eta Arantza Manterola Haurtzaroko lehendakariak sinatu duten hitzarmenarengatik, Udalak diru laguntzak emango dizkio ikastolari.

Mantenu lanetarako, ikastolako ikasle bakoitzarengatik eta Oiartzo Batxillergo Ikastolako ikasle oiartzuar bakoitzarengatik emango du laguntza Udalak.

Era berean, «lan handiak» egiteko urteko 32.500 euro jasoko ditu Haurtzarok Udalaren eskutik.

Garraioan, berrikuntza

Garraioaren arloan lortu duten adostasuna da berrikuntza nagusia. Agenda 21ek herriko mugikortasun arazoari irtenbidea aurkitu arte, Karrikara, Ergoienera eta Gurutzera autobusa jartzeagatik lagunduko dio Udalak ikastolari.

Ikastolako autobusean 118 ikasle ibiltzen dira, eta 20 dira hiru auzo horietakoak.

Laguntza hau jasotzeko Haurtzarok orain arte bezala Agenda 21eko kide «aktiboa» izaten segituko du.

Gainera, Udalak bere gain hartuko du ikastolako pilotalekuaren eta jolaslekuaren zorra, 581.152 euro. Eremu horiek Udalaren izenean erregistratu eta eskrituratuko dituzte.

Ikastolaren konpromisoak

Haurtzarok hartu dituen konpromisoen artean «bere instalakuntzak doan Udalari eta herriari uztea, euskara eta euskalgintza sustatu eta herrigintzan parte hartzea eta Oiartzungo herritik sortzen diren ekimenak babestu eta laguntzea» daude, «orain arte bezala»

Hitzarmenarekin, Haurtzarok «Oiartzunentzako ezinbestekoa den euskal kulturan oinarritutako hezkuntza sistema» egiten duela aitortzen da eta , era berean, ikastolen mugimendua euskal eskola propioaren bidean sortu zirela onartzeaz gain, «bide horretan oraindik egoera ekonomiko zaila bizi dute», adierazi dute.