Oarsoaldeko Hitza

Bihar hasiko da eta urte osoan iraungo du. San Pedroko Ondartxo Abesbatzak hogeitabost urte betetzen ditu aurten, eta urteurrena merezi bezala ospatzeko musikari lotutako zortzi ekitaldi antolatu dituzte, zein baino zein erakargarriagoak.

Lehen kontzertua bihar da, eta ez da nolanahikoa. Ondartxokoek gogor hasi dituzte ospakizunak eta Donostiako Orfeoia gonbidatu dute San Pedrora. Kontzertua, 20:00etan izango da, Pedro Deuna Elizan, musika korala atsegin duten guztien gozamenerako.

Tirri-Tarraren edota Paula Fachadoren kontzertuek osatzen dute Ondartxokoek gertuko lagunekin osatu duten eskaintza oparoa.

Aurkezpen jendetsua

Herenegun egin zuten Ondartxo Abesbatzako kideek atondu duten egitaraua aurkezteko prentsaurrekoa, iluntzean, Udal Aretoan. Agerraldian ez ziren bakarrik egon. Ondoan izan zituzten aurretik Ondartxo Abesbatzan kantatu duten lagunen ordezkaritza, baita garai batean Aingura Abesbatzan abestu zutenetako batzuk ere. Aingura Ondartxokoen haur abesbatza izan zen.

Haiekin batera, antolatu dituzten ekitaldietan parte hartuko dutenetako batzuk izan ziren, Gari, Montxo eta Joselontxo taldeko Joxean Malvado kasu. Aurtengo Musika Abesbatza Astean omenduko duten Fato Cultural Galegoko ordezkaria ere han izan zen.

Ongi errotutako eragilea

Aurkezpen ekitaldira hainbeste sanpedrotar batu izana ez da kasualitate hutsa. Izan ere 1983. urtean sortuz geroztik Ondartxo Abesbatza barrutian antolatu izan diren ekimen gehienen ezinbesteko partaidea izan da. Santa Ageda, Urte Zaharreko Koplak, Inudeak eta Artzaiak... guztietan eta guztiekin kolaboratu izan dute Ondartxo Abesbatzako partaideek.

Jaiotza ere, antzeko ekimen bati zor diote. Izan ere, 1982. urteko Gabonetako entseguak denboran luzatu eta abesteko errepertorioa zabaltzea erabaki zutenean jaio baitzen Ondartxo Abesbatza. Oraindik ere beraiek antolatzen dute Olentzeroren etorrera.

Hogeitabost urte hauetan ehun eta berrogeita hamar lagunetik gora igaro dira Ondartxo Abesbatzatik. Ekainaren 15ean horietatik asko elkartuko dira Ondartxo Eguna ospatzeko.

Kantagintzaren zaleak eta abeslari amorratuak

Ondartxo Abesbatzan batu diren lagunak kantatzea maite dute, eta ondorioz baita kantagintza maitatu ere. Herenegun esan zutenez, «abesten gozatu, eta hunkitu kantatzen entzuterakoan», horixe omen da beren leloa. Horregatik, urte hauetan guztietan gogor egin dute lan, San Pedrora musika jotzaile onak ekartzeko eta herritarrei «abesbatzaren mugimenduak zer- nolako magia duen erakusteko». Ondartxoren eskutik, gertuko nahiz atzerriko abesbatza handiak izan dira San Pedron.

Musika Abesbatza Astea

Berezia izanagatik, aurten inoiz baino oparoagoa izango da Ondartxo Abesbatzak landuko duen musika eskaintza, eta, ahalegina taldeak azaroan urtero antolatzen duen Musika Abesbatza Astean nabarituko da baita ere.

Sanpedrotarra Arraun Kluba izango da aurtengo astean izarra, klubak 50. urteurrena duelako. Fato Cultural Galegoko kideek egiten duten lana eskertuko dute baita ere, eta aitortza egingo diete barrutiko txistulariei.