Oarsoaldeko Hitza

Herenegungo ohiko udalbatzarrean jakinarazi zutenez, Haurtzaro Ikastolan eta Elizalde eskolan konposta egiteko makina bana jarriko dute, «epe laburrean».

«Gizartea kontzientziako erabili nahi dugu hezkuntza», azaldu zuen Aitor Etxeberria alkateak. Herriko bi ikastetxeetan konpostarako makinak jarrita «herritarrek ikusi eta emaitza onak ematen dituela konposta egiteak demostratu» nahi dutela gehitu zuen Etxeberriak.

Eguneko, 40 kilo hondakin

Ikastetxe bakoitzak eguneko 40 bat kilo hondakin sortzen dituela kalkulatu dute.

Makinak jarrita, «hiri hondakinen kudeaketa egokiaren bidean pauso txiki bat» emango dela uste du Udalak, «baina ziurra».

Xanet Arozena OiartzunBai-ko (OB) zinegotziak «positibotzat» jo zuen neurria. «Denok ari gara ikasten birziklatzen eta hezkuntza oso garrantzitsua da bide horretan».

Mozioa, EAE-ANVren gain

Jakinarazpena Oiartzun Ke? talde ekologistak aurkeztutako mozioa aztertzen aritu ondoren egin zuen Etxeberriak.

Oiartzun Ke?-k Oiartzunen atez ateko bilketa martxan jartzeko eskatzen zuen mozio horren bidez.

EAE-ANVk bere gain hartu zuen mozioa eta aldeko botoa eman zuen. «Gu proposatzen ari garen kudeaketa ereduarekin bat egiten du mozioak», esan zuen Pavel Viñas zinegotziak, «Gipuzkoako instituzio gehienek defendatzen duten eredua baino iraunkorragoa eta egokiagoa iruditzen zaigu», gehitu zuen.

Honen harira, Oiartzungo Udala atez ateko bilketa egiteko «pausoak ematen hasia» dela esan zuten, «eta aurrerantzean pauso gehiago emango ditugu hiri hondakinen kudeaketan».

Oiartzunek «konpostatzeko toki propioa izateko ahalmena» ere baduela esan zuten udal ordezkariek.

Etxeberriak azpimarratu zuen «instituzioen arteko adostasun ahalik eta handiena egotea hondakinen kudeaketan zeinen garrantzitsua» den, Herrialde Katalanetako eredua jarraituz.

OB abstenitu egin zen

OBko zinegotziak abstenitu egin ziren. San Markos eta Debagoieneko mankomunitateek Herrialde Katalanetako esperientziaren «informeak esku artean» izan arte, eztabaidan ez zutela sartu nahi esan zuen Arozenak.

Hala ere, berriz eskatu zuten «San Markos ixteko eta Udalak Oiartzunen zabortegirik jartzen ez zuela utziko» gaineratu.

Errauste plantari buruzko eztabaida ere izan zuten. Viñasen ustez, «errauste planta eta birziklapena ez dira uztargarriak».

Kutxako ordezkariak

Gai zerrendaz kanpo, Kutxarekin zerikusia zuten bi gai ere jorratu zituzten. Batean, EAE-ANVren aldeko sei botorekin eta OBren abstentzioarekin, Juan Inazio Ansa izendatu zuten Udalaren kontseilari orokor, eta Idurre Bera ordezko.

Bestetik, Lezo, Bergara eta Usurbilekin, helegitea jartzea onartu zuten boto berekin, «2010 arte ez dagokigula laurok osatutako elkartearen kontseilari orokorrik esan du Kutxak, eta ez da legezkoa», aipatu zuten.