Oarsoaldeko Hitza

Igande goizean irten ziren Pasaiatik eta astebete emango dute han. Herbehereetako Roermond hirira joan dira Pasaia-Lezo Lizeoko Batxilergoko 1. mailako hamazazpi ikasle, bi irakaslerekin lagunduta. Bisschopelijk College Broekhin institutuko ikasleen etxeetan dira.

Lehengo azaroan hango ikasleak izan izan ziren hemen, Lizeoko ikasleen etxean. Izan ere, Pasaia-Lezo Lizeoak ingelesaren mintzapraktika ardatz hartuta urtero antolatzen duen egitasmoaren baitako eskola trukea baita.

Eskola trukea, hala ere, ez da ingelesaren mintzapraktikara mugatzen. Beste arlo asko lantzen dituzte eskola trukean parte hartzen duten ikasleek.

Programa aberatsa

Pasaia-Lezo Lizeotik jakinarazi dutenez «oso progama osatua» da ikasleak han lantzen ari direna. Bisita turistikoak egingo dituzte, eta, besteak beste, Maastrich eta Utrech bisitatuko dituzte.

Harremanetarako hizkuntza ingelesa izango den arrren, herbeerearrek klaseetan parte hartuko dute eta oinarrizko nederlandera ikasteko aukera izango dute baita ere.

Ikasle pasaitarrek jaialdi kulturala prestatu dute eta, ikastolako iturrietatik aditzera eman dutenez, «Euskal Herriko enbaxadore lana egingo dute hango familien aurrean». Hemengo dantzak, kultura, musika eta bestelako ohituren berri emango dizkiete, baita gure eskualdeari buruzkoak azaldu ere.

Eskola trukearen bidez, Lizeoak ez dio soilik erreparatzen alde akademikoari. Arlo pedagogikoa eta ikaslearen garapen pertsonala bultzazeko egitasmoa da ikastolak aurrera ateratzen duena.

Esperientzia luzea

2004ko abenduan hitzartu zuen Lizeoak eskola trukea herberearrekin, eta orduz geroztik ikasturtero gauzatu duten ekimena da.

Hala ere, lehenagotik ere badute esperientzia Lizeokoek halako ekimenetan. Aurretik, hungariarrekin eta poloniarrekin egin izan dituzte eskola trukeak.