Oarsoaldeko Hitza

Herritarrak Informatzeko Gunea aurkeztu zuen atzo Errenteriako Udalak. Udal Liburutegian jarri dute, eta bertatik erakunde publikoekin harremanetan jarri ahal izango dira herritarrak. Hain zuzen ere, horixe da gunearen helburua: erakunde publikoekiko harremanak erraztea eta gerturatzea. «Herritarrak informatzeko gunean ordenagailu bat izango da, eta bertatik erakunde publikoekin harremanetan jartzeko aukera. Galderak, zalantzak edo bestelako eskariak egin ahal izango dituzte herritarrek», azpimarratu zuen atzoko agerraldian Juan Carlos Merino alkateak.



Zerbitzu aniztasuna

Herritarrak Informatzeko Guneko ordenagailutik erakunde publikoen webguneetan sartzeko aukera izango dute herritarrek. Halaber, SMSak eta mailak bidali ahal izango dituzte. «Etxean ordenagailurik ez duten herritarrentzat oso zerbitzu egokia da. Erakunde publikoekin harremanetan doan jartzeko aukera emango diegu, eta herritik mugitu gabe hainbat eskari kudeatu ahal izango dituzte», azaldu zuen Merinok.

Herritarrak Informatzeko Guneko zerbitzuak doan erabili ahal izango dira, baina ordenagailuan sartu ahal izateko nortasun agiri elektronikoa edo herritarren txartel berdea erabili beharko dela jakinarazi dute Udaletik.

Herritarrak Informatzeko Gunerik ez zegoen orain arte gure eskualdean. Donostian edo Irunen, ordea, orain dela hilabete batzuk jarri zituzten, eta oso harrera ona izan dute. Udal Liburutegiko guneak arrakasta izanez gero, aurrerantzean gehiago zabaltzeko aukera ez du baztertu Udalak. «Donostian eta Irunen esan digutenez, Herritarrak Informatzeko Guneek oso harrera ona izan dute, eta bat baino gehiago zabaldu dute. Horregatik, aurrerantzean beste gune bat zabaltzea ez dugu baztertzen», onartu zuen Merinok atzoko agerraldian.