Oarsoaldeko Hitza

Arrantzaleek une goxorik bizi ez dutela gauza jakina da, baina berdelaren kanpaina ez doa gaizki. Gipuzkoako arrantzaleen buru eta San Pedroko kofradiako lehendakari Jaime Tejedorrek aditzera eman duenez, kostera hasiz geroztik 800. 000 kilo inguru berdel deskargatu dituzte San Pedron.

Atzo bertan, hiru ontzik deskargatu zuten Pasaian, eta guztiak berdelez lepo porturatu ziren. 1400 kaxa batek, 1000 inguru bigarrenak... Gau guztia arrantzan eman ondoren, nahikotzat jo zituzten arrantzaleek harrapaketak.

Akordio baten bila

Antxoaren kasuan arazoa espeziearen eskasia bada, berdelaren kasuan bestelakoa da orain sortu den arazoa. Lehen berdela harrapatzen ez zuten askok, besterik ezean, berdeletan ari dira orain, eta horrek gehiegizko ustiaketa eragin du. Merkatuan komeni baino berdel gehiago ari da sartzen, eta horrek arazoak sorrarazi ditu. Lehengo asteazkenean, Gipuzkoako hainbat arrantza ontzi Xixongo (Asturias, Espainia) portura berdela deskargatzera zihoaztela, baimena ukatu eta etxera bueltatu behar izan zuten berdelarekin.

Bertako arrantzaleak kexu dira eta gertatu zitzaiena «legez kontrakoa» dela diote. Izan ere, Tejedorren arabera, ez baitago oraingoz berdelaren harrapaketak arautzeko legerik.

Akordio adosteko helburuz Hondarribian bildu ziren atzo bertako arrantzaleak. Proposatu dizkieten kupoak onartzeko prest daude, baina, kupo horien kudeaketa egunero egin baino, astero egitea eskatzen dute.