Oarsoaldeko Hitza

Langileak esplotatzea leporatuta hiru pertsona atxilotu ditu Polizia Nazionalak. Atxiloketak Errenteria-Oreretan eta Donostian izan dira. Doner Kebap izeneko jatetxeetako jabeak dira atxilotutakoak, hirurak Pakistandarrak. Polizia iturrietatik zabaldu dutenez, gutxienez hamaika pertsona esplotutu dituzte, guztiak paperik gabekoak. Paperik gabeko langileak «modu antolatuan» esplotatzea egozten diete.

Poliziaren arabera, atxilotuek «dirua zuritzeko» erabiltzen zituzten jatetxeak. Dirua «legez kanpoko pertsonen trafikotik», obretako langileak esplotatzetik eta «pisu pateren» errenta altuetatik lortzen zutela eman dute aditzera Polizia iturriek.

Bestalde, paperik gabeko hamaika langileei «halakoetan ezartzen zaien legeria aplikatu» dietela esan dute.

Errenterian bi miaketa

Errenteria-Oreretan dauden izen horretako bi jatetxeetan miaketak egin ditu Polizia Nazionalak. Jatetxe bat Iztietan dago, eta bestea Kaputxinoetan. Donostian Doner Kebap kateak dituen beste lau jatetxeak miatu dituzte baita ere. Donostiako Mirakruz kalean dagoen jatetxean, hain zuzen, «pisu patera» gisa erabiltzen zutena topatu dute. Esplotatutakoak han egoera penagarrian bizi zirela uste dute. Pisuan hamar koltxoi, bainugela bat, hozkailua eta telebista aurkitu dituzte

Auzian lagun gehiago egon daitezkeela inplikatuta uste du Poliziak, eta ez dute baztertzen atxiloketa gehiago egoterik.