Oarsoaldeko Hitza

Gipuzkoako Batel Ligako bederatzigarren estropada Errenteria-Oreretan jokatu zen atzo, erlojupean. Seniorretan Zarautzek irabazi zuen estropada, kontrario zuzenak dituzten oriotarrei bi segundoko aldea atereaz. Hibaikako laukotea bosgarren izan zen, eta haien aurretik, laugarren postuan Trintxerpeko Illunbe B ontzia iritsi zen. Illunbeko A ontzia seigarren izan zen, eta C batela, azkena, Tolosaldeko batel mistoaren atzetik.

Jubeniletan Zumaiako Aita Marikoek irabazi zuten, eta Koxtapek uretaratutako bi ontziak laugarren eta seigarren postuetan iritsi ziren. Laugarren izan zen arrosen A ontzia eta seigarren B ontzia.

Nesketan, Tolosaldeko batela izan zen nagusi, eta azkenak, aldiz, Hibaikakoak. Pasai Donibanekoak laugarren postuan irit si ziren.

Kadeteetan, Sanpedrotarra nagusi

Eskualdeko ontzien arteko garaipen bakarra San Pedrokoek lortu zuten atzo, Kadeteetan. Moreek beste behin irabazi zuten, eta beren taldeko sailkapenaren buru dira, 17 punturekin. Pasai Donibane-Koxtapek bi ontzi ditu kadeteetan: arrosen A ontzia seigarren izan zen eta B ontzia azkena, hamairugarren postuan. Illunberen batela hamargarren izan zen Kadeteetan.

Haurretan, Orioko neskak eta Hondarribiako mutilak nagusi

Arraunean irteten lehenak haurrak izan ziren, Oiartzun ibaiaren bi aldeetara bildutako ikusle ugariren txalo artean. Nesketan, Oriok irabazi zuen, Tolosaldeako batelaren aurretik. Hirugarren, sanpedrotarren batela izan zen, eta Koxtaperena seigarren. Illunbe azkenaurrekoa izan zen, bederatzigarren postuan.

Mutiletan Hondarribiako batelak irabazi zuen eta Pasai Donibaneko A ontzia bigarren izan zen. Arrosen B ontzia seigarren izan zen, eta aurretik Getariako bi ontzi eta Tolosaldeakoa izan zituen.