Oarsoaldeko Hitza

Aralar alderdiak Udaleko batzar informatiboetan parte hartzeko eskaera egin du. Martxoan aurkeztu zuten eskaera Errenteriako Udalean, eta erabakia hartzearen arduradunek baiezkoa ematea espero dute. «Alkateak trabarik ez jartzea espero dugu, baietz esango digutelakoan gaude. Gure asmoa batzar informatiboetan parte hartzea da, eta herriko politikagintza gertutik jarraitzea. Hartzen diren erabakien berri bertatik bertara jakin nahi dugu, eta eztabaidetan parte hartu. Gauza bera egiten dugu Lezoko, Oiartzungo, Hondarribiko eta Irungo udaletan», azpimarratu zuen Iñigo Imaz Aralarko kideak.

Hauteskundetako emaitzekin gustura

Martxoaren 9ko hauteskundetako emaitzekin «gustura» azaldu ziren atzo Aralarko kideak. «665 boto lortu genituen, aurreko hauteskundeetan baino ehun boto gehiago. Emaitza onak dira, ez baita ahaztu behar politikariek boto eraginkorraren aldeko kanpaina egin zutela», azaldu zuen Imazek.

Herriko ia auzo gehienetan boto gehiago jaso dituztela azpimarratu zuten Aralarko kideek, eta hori alderdia sendotzen ari den seinale dela azpimarratu zuten: «Alderdi txikia gara, baina handitzen joateko aukera dugu. Errenteria Gipuzkoako hirugarren herri handiena da, eta bertan pisu handiagoa izateko lana egingo dugu aurrerantzean».

Zabortegiaren auzia

San Markoko zabortegiaren auziarekin amaitzeko lanean ari dira Aralarko kideak. Zabortegia ixteko plana aurkeztuko dute aurki erakundeetan: «Zabortegia berandu baino lehen ixtea komeni da, eta guk helburu hori gauzatzeko plana osatu dugu. Helburua zabortegia ixtea eta, bertan, hiritarrentzako berdegune bat sortzea. Izan ere, gaur egungo egoera ez dago gehiago jasaterik», adierazi zuen Imazek.