Oarsoaldeko Hitza

103 poligonoan dagoen Rubitec enpresako langileek greba mugagabean jarraitzen dute oraindik. ELA sindikatuaren arabera, grebarekin aurrera jarraituko dute «enpresa langileen ordezkaritzarekin negoziatzera eseri arte ».

Pasa den martxoaren 31n hasi zuten greba mugagabea kautxoa manipulatzen duen lantegiko langileek, enpresa kontratazioan «legez kanpo jokatzen» ari dela salatuz, eta era berean, «lan osasunari eta prebentzioari dagozkioen alorretan beharrezko neurriak ez betetzea» ere egozten diote enpresari.

ABLE bidez kontratatutako langileak

ELA sindikatuaren esanetan, Rubitec enpresan plantilako langileez gain, ABLE (Aldi Baterako Lan Enpresa) bidez kontratatutako zenbait langilerekin ari da lanean, «gehienbat etorkinak direnak».

«ABLE bidez kontratatutako jendea koiunturalki egon daitekeen lan kargari erantzuteko lanean aritu beharrean, lanpostu arruntak betetzen ari dira. Beraz, argi dago enpresa iruzurra egiten ari dela kontratazio arloan», adierazi du eskualdeko ELAk.

«Ez da aldaketarik izan»

«Langileek zoritxarrez ez dute greban hastea beste aukerarik izan. Enpresako zuzendaritzak sistematikoki negoziaketari buruzko ezeri buruz hitz egiteari uko egin dio», zehaztu du sindikatuak.

ELAren arabera, orain hiru hilabete plataforma bat sortu zuten lan segurtasunari buruz eta kontratazioari buruz enpresako zuzendaritzarekin hitz egiteko. Hala ere, ez dutela inolako erantzunik jaso zuzendaritzatik. Hein berean, OARSOALDEKO HITZAk Rubitec enpresako kudeatzailearekin hitz egin du eta zuzendaritzak ez duela gai honen inguruan deus esan nahi adierazi dio.

Kimikaren sektoreko hitzarmenaz

Greban dauden langileek kimikaren sektorerako hitzartuta dagoen estatu mailako hitzarmena «hobetu» nahi dutela adierazi izan dute. «Enpresa oso eroso dago orain arteko funtzionamenduarekin, eta ez ditu gure baldintzak hobetu nahi», adierazi zuen Amaia Colina ELAko ordezkariak greba mugagabeari ekin zioten egunean.