Oarsoaldeko Hitza

Pasaiako PSE-EEk Antxoko Biteri plazaren inguruko argibideak emateko eskatu dio Pasaiako alkate Maider Zigandari. Horretarako, hilaren 17an egingo den Hirigintza Batzordean gai hau kontuan hartu dadin eskatu dute, «Jaurlaritzak proposatu dituen aldaketen berri izateko».

Jaurlaritzak Biterin egitekoak diren etxebizitza eta garajeen inguruko zenbait aldaketa proposatu zizkion Pasaiako Udalari joan den urteko amaiera aldean. Zentzu honetan, aldaketa horiek zeintzuk ziren jakin nahi izan zuten Pasaiako PSE-EEko kideek. «2007ko urrian Hirigintza Batzordean aldaketa horien berri jakiteko asmoa azaldu genion alkateari. Gaia, mahaiaren gainean uzteko asmoa azaldu zuen alkateak, presarik ez zegoelako».

Hein berean, Biteri plazako egitasmoaren aldaketen inguruan komunikazio plana egingo zuela aditzera eman zuen Maider Ziganda Pasaiako alkateak.

«Denbora nahikoa pasatu da»

Pasaiako Udaleko PSE-EE taldearen ustez, «alkateak gaia mahai gainean utzi zuenetik denbora tarte nahikoa pasatu da. 2007an egin genuen Biteriri buruz hitz egiteko eskaera, eta oraindik, 2008ko apirilean, ez dakigu deus ere», esan dute Izaskun Gomez buru duen taldekoek.

PSE-EEkoek esandakoen arabera, «ez dakigu Jaurlaritzarekin Biteriko plana berraztertzeko egitekoak ziren negoziazioak aurrera jarraitzen duten, non dauden, edo alkateak esan zuen komunikazio plan hori zertan den eta nolakoa izango den». Hartara, «zalantza horiek argitzeko» eskatu diete gobernu taldeko ordezkariei.

Joan den legegintzaldikoa

1999-2003 legegintzaldian, hau da, alkatetza PSE-EE eta EB-Berdeen esku zegoenean sinatu zuen Pasaiako Udalak Eusko Jaurlaritzako Etxebizitza Sailarekin Biteri plaza biziberritzeko hitzarmena. Hasierako hitzarmen horri aldaketak erantsi nahi izan dizkio Jaurlaritzak, eta horien berri jakin nahi du PSE-EEk.