Oarsoaldeko Hitza

Patxi Azpiazu herriko atleta hirugarren gelditu da Espainiako Txakurkros Txapelketan, Beteranoen Mailan. Gizakia eta txakurra elkarrekin korri egiten duten kirol modalitatea da txakurkrosa, eta denboraldi honetako Espainiako Txapelketa iragan igandean bukatu zen, Brafim herrian (Tarragona, Herrialde Katalanak) jokaturiko proban.

Denera, 13,6 kilometroko luzeera izan zuen probak. Baina, kilometro kopuruarengatik ez ezik, ibilbideagatik ere oso lasterketa gogorra izan zen: parte-hartzaileek mendi bat igo behar izan zuten, eta malda arriskutsuak jaitsi, besteak beste. Gainera, egunean bertan egindako sargoriak are gogorragoa bihurtu zuen proba.

Emaitzarekin oso pozik

Guztira, 65 parte-hartzaile bildu zituen Brafimgo probak. Betty izeneko dobermanarekin korri egin zuen Azpiazuk, eta helmugara zortzigarren postuan iritsi ziren biak. Beteranoen Mailan, ordea, hirugarren izan ziren proban.

Denboraldiko azken lasterketa izaki, probako sari banaketaren ondoren, Espainiako Txakurkros Txapelketako sariak banatu zituzten. Eta, sailkapen orokorreko hirugarren postua lortuta, podiumera igo ziren berriro Azpiazu eta Betty.

Brafimgo lasterketa baino lehen, Azpiazuk berak bazekien hirugarren izango zela Espainiako Txakurkros Txapelketan, azkenaurreko proban (martxoaren 30ean, Sorian) lorturiko puntuei esker. Baina Brafimgo emaitzarekin oso pozik agertu da Azpiazu.

Iban Angulo, bederatzigarren

Denboraldi honetan, guztira, 13 probaz osaturik egon da txapelketa. Azpiazuk, ordea, 10etan parte hartu du, oso emaitza onak lortuz: bi probatan bigarren gelditu da, hirutan hirugarren... Iaz bigarren bukatu zuen txapelketa Azpiazuk. «Baina gero eta konpetentzia gehiago dago», esan du.

Iban Angulo lezoarra, berriz, bederatzigarren izan da Senior Mailan, bere lehen denboraldian.