Oarsoaldeko Hitza

Elias Salaberria memorialaren beka eskuratzeko izen-ematea zabaldu du Eusko Ikaskuntzak Udalaren laguntzarekin batera. Aipatutako beka eskuratzeko Eusko Ikaskuntzaren bulegoan aurkeztubehar dira dokumentuak maiatzaren 5a baino lehen. Bestela Eusko Ikaskuntzaren e-posta honetara bidal daiteke bekak@eusko-ikaskuntza.org.

Elias Salaberria memorialean sariak ematen 1968. urtean hasi ziren eta lan horien katalogazioa egiten ere. Eusko Ikaskuntzatik jakitera eman dute, aipatutako lana burutzeko «hemeroteka lan sakona» egin beharko dela.

Hautagaitzak

Elias Salaberria memorialaren beka eskuratu ahal izateko hainbat baldintza bete behar dituzte hautagaiek: arte gaietan adituak edo ikasleak izan behar dira. Bakarka edo taldeka aurkez daitezke hautagaitzak, baina taldeka aurkeztuz gero, zuzendari bat izendatu behar dute horretarako. Eusko Ikaskuntzako kide bihurtuko dira beka eskuratzen dutenak, «edo bestela lana hasteko kide izateko eskaera luzatu beharko dute».

Horrez gain, Eusko Ikaskuntzak adierazi du lehentasuna izango dutela Lezon edo inguruko herrietan erroldaturiko pertsonek, eta lana euskaraz izan behar dela.

Iraupena eta diru kopurua

Elias Salaberria memorialaren beka eskuratuta lau hilabeteko epea du bekadunak. Horrez gain, 2.800 euroko diru kopurua jasoko du azterketa egin ahal izateko.

Hein berean, Eusko Ikaskuntzak adierazi du lana hiru zatitan entregatu beharko dela: lehenengo lana hasterakoan aurkeztu beharko du; bigarrena, berriz, bekaren erdian ikerketaren garapenari buruzko txostena aurkeztu ondoren. Hirugarrena, aldiz, «dagokion lana entregatzerakoan, beti ere jatorrizko txostenean agerturiko premisa metodologikoak eta proiektuak betetzen dituela egiaztatuz». Eusko Ikaskuntzatik nabarmendu dute, Elias Salaberria memorialerako egindako lanen jabeak egileak izango direla.

Era berean, Eusko Ikaskuntzak eta Lezoko Udalak hautagaien artean erabakiko duen epaimahaia osatuko dutela esan du, eta beka eskatzeagatik uko egiten diotela ebazpenaren aurka egiteari.