Oarsoaldeko Hitza

Haurtzaro Ikastola eta Gwisseniko (Bretainia) Diwan arteko elkartrukea dela eta, 41 ikasle bretoi astebete pasatzen ari dira Oiartzungo ikasleen etxeetan.

Euskara baino, bretoiera entzun zen atzo udaletxeko areto nagusian. Izan ere, Gwisseniko (Bretainia) Diwan-eko ikasleek Aitor Etxeberria alkatearen ongietorria jaso zuten.

Dagoeneko ia astebete daramate 41 gaztetxo bretoik Oiartzunen, Haurtzaro Ikastolako DBHko ikasleen etxeetan. Lau irakasle ere etorri dira eurekin.

Eurak hemengo 14-15 urteko ikasleak dira, Frantziako Estatuko hezkuntza sisteman, kolegioko 4. eta 5. mailakoak.

Alkatearen ongietorria

Etxeberriak ongietorria emateaz gain, «asko ikasi izana eta oso ondo pasa izana» opa zien ikasleei.

«Garrantzitsua da Oiartzunera eta Euskal Herrira jendea bisitan etortzea, gure errealitatea ezagutzeko», esan zien Etxeberriak.

Izan ere, aitortu zuten Bretainian, askotan, Euskal Herriari buruzko iritzia ez dela oso ona.

Etxeberriak bi herrien arteko «harremana eta anaitasuna urte askorako» izatea opa zuen, eta «udan, Bretainia aldera joatea espero dut, ez bainaiz inoiz han izan».

Opariekin atera ziren udaletxetik: egutegia, postal bat eta Oiartzuni buruzko argazki liburua.

Bisitarekin, «oso gustura»

Gwenole Peaudecerf, Lolita Lecompte eta Mathilde Ollivier dira Gwisseniko Diwan-eko ikasle bretoietako hiru -diwanetan hezkuntza guztia euskaraz da, hemengo ikastolen antzekoak-. «Oso ongi» ari dira pasatzen egonaldian.

Lehenengo aldiz etorri dira Oiartzunera, baina Peaudecerf bosgarren aldiz etorri da Euskal Herrira.

Gernika, Hondarribia, Aiako Harria, Herri Musikaren Txokoa, Luberri... bisitatu dituzte. Baina, gehien gustatu zaiena «Realaren partidua, Anoetan!» izan da. Gainera, irabazi egin zuen Realak, «gure animoengatik».

«Jendearen arteko harremanak oso ezberdinak dira hemen eta Bretainan», dio Ollivierrek, «hemen askoz harreman gehiago duzue zuen artean».

«Eta eguraldia!», dio Peaudecerfek, «Euskal Herrian askoz hobea da».

«Elkartruke aberasgarria»

Haurtzaro Ikastola ere oso pozik dago elkartrukearekin. «Oso aberasgarria da beste kulturekin harremana izatea, eta hizkuntzak praktikatzea, ere bai» dio Sorkunde Lekuona zuzendariak.

Haurtzaroko hainbat ikasle egon dira Bretainian, «hauen esperientzia dagoeneko bizitu dute», gehitu du Lekuonak.

«Ikasleek harrera egiten, besteengatik kezkatzen, ardurak hartzen ikasteko balio du etxean bretoiak izatea», uste du ikastolako zuzendariak.

Jakin-min handia

Jakin-mina ere badute bretoiek Euskal Herria ezagutzeko. Atzo, ikurrinaren bazterrean Oiartzungo bandera ikusita, batek ezin izan zion galderari eutsi, «nongo bandera da?».

«Asko galdetzen dute», dio Lekuonak -berak bi ikasle ditu etxean-, «jakiteko gogoa nabarmena da».