Oarsoaldeko Hitza

Antxon, bigarren urtez jarraian, koadrila arteko Futbol Txapelketa izango da. Interbares historikoaren jarraipena den lehian hilaren 14ra arte eman dezakete izena koadrilek. Partaide guztien bilera, berriz, hilaren 16an egingo dute, txapelketaren araudia talde bakoitzeko ordezkariei jakinarazteko, eta egutegia zehazteko.

15 urtetik gorakoentzat da Futbito Txapelketa. Talde bakoitza gutxienez bost kidez osatua egon behar da, eta gehien jota hamarrekoak izan behar dute. Taldeek Antxokoak izan behar dute derrigor.

Izena emateko guneak jarri dituzte barrutiko taberna hauetan: Mimos, Dani, Izadi, Laket, Kamio eta Kirolak. Parte hartzeko 50 euro ordaindu behar dira, eta apirilaren 16ko bileran eman behar zaizkie antolakuntzako kideei.

Joan den urteko arrakasta

Iaz, Basari Elkartearen babesarekin egin zen Futbito Txapelketa, baina aurten, Antxoko gazte koadrila batek hartu du antolaketaren ardura. «Joan den urtean», esan dute, «izan genuen arrakasta ikusirik, aurten ere txapelketa egitea merezi zuela uste genuen, eta hala egin dugu».

Lehiaren helburua, kirolarekin gozatzeko aukera emateaz gain, «herriari bizitasun pixka bat ematea» dela aitortu dute antolatzaileek, «eta bide horretan aurrera jarraituko dugu». Neurketak Usozko futbito zelaian egingo dira, eta finalak, sanferminetan.