Oarsoaldeko Hitza

«AHTren inguruko eztabaidaren ondoren, oiartzuarron iritzia gizarteratzea da gure asmoa». Horrela aurkeztu berri du bere burua herriko AHT Gelditu! Elkarlanak.

Azpiegitura erraldoia eraikitzearen kezkak eraginda, herriko hainbat eragile biltzen hasi dira. Oiartzuar guztiei deia ere egin diote, «elkarrekin lanean hasi eta proiektu honi buruzko eztabaida irekitzea martxan jartzeko».

«AHT baino gehiago»

AHTren informazioa «lortzeko zailtasunak» salatu dituzte erakundeen aldetik, eta «gizarte eredua erabat aldatuko» dela ere bai, «diru publikoa patrika pribatuak aberasteko erabiliz».

Oiartzuni ere «zuzenean» eragingo diola azpimarratu dute.

AHTz gain, proiektu honekin batera Gaintxurizketara lotunea ere aurreikusita dago, «abiadura handiko trenarentzako izango ez den beste 1,7 kilometroko tunel bat egingo litzateke Arkaletik Oliden aldera». Astigarraga eta Arragua lotzeko Renfe bidea egitea ere aztertzen ari dira.

Astelehenero biltzen dira

AHT Gelditu! Elkarlana astelehenero 20:30ean biltzen da Kataxulo gaztetxian. «Nahi duen guztiarentzako irekia dago taldea».

Datozen hilabetetan herrian ekimenak antolatuko dituztela ere jakitera eman dute, «adi egon ekimenei».