Oarsoaldeko Hitza

Errioxako XIII. Kultur Astearen ekitaldi nagusia egingo dute gaur, Gamon Zumardian. Goizeko 11:30etik aurrera, Errioxako produktuen dastaketa, Voces Riojasnas talde folklorikoaren musika eta Errioxako dantzak izango dira. «Errioxako kultura, ohiturak, musika, dantzak eta gastronomia ezagutzeko aukera emango diegu gerturatzen diren herritarrei», azpimarratu zuen atzoko prentsa agerraldian Cesar Marin Gipuzkoako Errioxako Etxeen ordezkariak.

Gipuzkoako Errioxako Etxeetako zuzendaritzak bultzatuta, orain dela 13 urte hasi ziren Errenteria-Oreretan Errioxako Kultur Astea antolatzen, eta dagoeneko herriko ekitaldi klasikoetako bat da. «Errenterian errioxar asko bizi dira, eta horrek asko laguntzen digu ekitaldiak antolatzeko garaian. Jendea beti dago laguntzeko prest, eta egitarauaren osaketan parte hartzen du. Egia esan, guretzat plazer handia da Errioxako Kultur Astea antolatzea», azaldu zuen Marinek.

Datorren asteko hitzaldiak

Errioxako Kultur Asteko ekitaldi nagusia gaur egingo duten arren, datorren asterako lau hitzaldi antolatu dituzte. Astelehenean, Brionesko Erdi Aroko jaialdiari buruz ariko dira; asteartean, San Vicente de la Sonsierrako Picaos Kofradiaren inguruan; asteazkenean, Errioxako elikagai ekologikoak izango dituzte hizpide; ostegunean, azkenik, Daniel Puras upategiko arduradunak emango du hitzaldia.

«Hitzaldi arinak eta interesgarriak izango dira. Urtero gaiak aldatzen ditugu, eta aurtengoan bereziki asmatu dugula uste dut. Gainera, hitzaldi bakoitzaren amaieran Errioxako produktuak dastatzeko aukera emango dugu», adierazi zuen Marinek. Reina aretoan izango dira hitzaldi guztiak, arratsaldeko 20:00etatik aurrera. (Hitzaldien inguruko xehetasun gehiago beheko taulan).