Oarsoaldeko Hitza

Bertsolaritza

Miren tabernan izan zen kanporaketa herenegun, Arantzazu Martiarena gai-jartzaile zela

g. lAbandibar

Juanito eta Karmele Mitxelena aita-alabak eta Manu Goiogana irundarrak osatutako bikotea izango da Herriko Txapelketako finaleko bertso-afarian ariko den hirugarrena.

Horrela erabaki zuten epaileek, herenegun gauean bertsozalez betetako Miren tabernan izandako saioaren ondoren.

Kanporaketan parte hartu zuten beste bi hirukoteak hauek izan ziren: Ion Ansa, Alaia Martin eta Juan Mari Lopez batetik, eta Eneritz Zabaleta, Ander Lizarralde eta Arkaitz Oiartzabal Xamoa bestetik.

Miren tabernako saioan, berriz, Arantzazu Martiarena aritu zen gai-jartzaile lanetan.

Saio txukuna eta ona egin zuten hiru taldeek, baina onenak Mitxelenatarrak eta Goiogana izan zirela erabaki zuten epaileek.

Entzuleak ere gustura atera ziren saiotik, bertsotan entzundakoarekin.

Hilaren bukaeran, finala

Herriko txapelketako finala hilaren 26tik aurrera izango den Bertso Astean izango da, Girizia Elkartean. Apirileko azken asteburuan eta maiatzeko lehenengoan izango dira ekimenak.

Finalerako sailkatu diren beste bi hirukoteak hauek dira: Arkaitz Goikoetxea, Karlos Aizpurua eta Egoitz Zelaia, eta Jon Martin, Abel Zabala eta Oskar Ibarguren.

Finalean izango diren bertsolarien artean, batzuk dagoeneko badakite zer den azken saioraino heltzea, baita txapela janztea ere.

Azken urteetan finalean izan dira, adibidez, Jon Martin, 2005ean; Manu Goiogana, 2005ean eta iaz; Oskar Ibarguren ere finaleko izan zen, iaz; Karlos Aizpurua, 2006an; eta Arkaitz Goikoetxea bera, 2005ean.