Oarsoaldeko Hitza

Bertizera asteburupasa abenturazko kirolak eginez eta Gazte Foroak antolatutako lehenengo bideo lehiaketa. Horiexek herriko bi ikastetxeetako DBHko gazteek antolatu dituzten azken ekimenak.

Antolatu duten asteburupasa Kuadrillategi egitasmoarekin batera antolatu dute, «horrela, gazte gehiago bilduko garelako».

«Abentura gogoz»

Jendea «abentura gogoz» zegoelako antolatu dute Bertizera asteburupasa. Datorren asteburuan egingo dute. «Hurbilen Bertiz genuen», azaldu du Ane Intxauspe Gazte Foroko kideak.

Larunbat arratsaldean Bidarrain egingo dute rafting, «begiraleekin eta beharrezko materialarekin».

Gaur eta bihar izango dira azken egunak izena emateko. Gaur, 17:30etik 19:30era eta bihar, 10:00etatik 13:00etara, Zamatetako Gazte Informazio Bulegoan.

Sormenari bultzada emanez

Bideo lehiaketa ere antolatu dute, lehen aldiz. Mugikorrekin, kamerarekin... gazte bakoitzak nahi edo ahal duenarekin graba dezake. «Originalak izan behar dute», zehaztu dute Gazte Foroko kideek, «ez du balio beste norbaiten lana erakustea».

«Parte-hartzaile guztiek baliabide eta maila antzekoak izatea nahi dugu», zehaztu du Maialen Galdosek, «abantaila ez izatearren batzuk besteengan».

Sari banaketa, Arraguan

Maiatzaren 16an, Kuadrillategiko gaztetxoen aurrean emango dituzte lehiaketara antolatutako bideoak, eta Gazte Foroko kideek epaitu egingo dute.

Arraguako jaietan, gainera, sari banaketa izango da.

«Jendeak proposatzen duenaren baitan antolatzen ditugu ekimenak, jendeak parte hartzeko», azaldu dute. Bideo lehiaketaren ideia ere hala sartu zen.

Denak animatu dituzte «ez dugu egunero horrelako ekimenetan parte hartzeko aukera, eta baliatu egin behar dugu», uste dute Gazte Foroko gaztetxoek.