Oarsoaldeko Hitza

Kale erasoak egin izan dituztelakoan, EspainiakoPoliziak hamar gazte atxilotu zituen atzo goizaldean Oiartzun, Errenteria-Orereta eta Arrasate herrietan. 2005etik Lezon, Oiartzunen eta Errenteria-Oreretan hogei bat kale eraso egitea egotzi diete. Poliziak, denera, 18 miaketa egin zituen (etxeetan, elkarteetan...) atzoko egunean. Baina operazioak zabalik jarraitzen duela errepikatu zuten atzo, behin eta berriz, iturri polizialek.

Atzoko atxilotuak Madrilera eraman dituzte, Espainiako Poliziaren egoitzara, gero Espainiako Auzitegi Nazionaleko epaile Fernando Grande-Marlaskaren aurrean deklara dezaten. Atzo arratsaldean hainbat iturrik zabaldutakoaren arabera, etzi bertan has daitezke epailearen aurretik pasatzen. Baina polizien eskuetan ere bost egun pasa ditzakete atxilotuek, inkomunikatuta jarraitzen duten neurrian.

03:30-04:00ak artean

Fernando Grande-Marlaskaren beraren aginduz egin zituzten atzo atxiloketak, 03:30ak eta 04:00ak artean hasita.

Errenteria-Oreretan, Haizea Iriarte (27 urte), Xabier Lujanbio (22), Harkaitz Antza (21), Aitor Franco (20), Gorka Etxeberria (23), Aitor Alberdi (22) eta Beñat Burlada (24) atxilotu zituzten Espainiako poliziek. Lehenbiziko laurak, erdialdean; Etxeberria, Pontika auzoan; Alberdi, Galtzarabordan; eta Burlada, Fanderian.

Oiartzunen, bitartean, Jon Mikel Otxoa (21 urte) eta Alex Etxeberria Oiartzabal (23) atxilotu zituzten, goizeko lauetan, Ugaldetxo auzoan. Oiartzunen bertan beste etxe batera joan zen Polizia baina, inor aurkitu ez zutenez, atea bota eta etxea miatu zuten. Antza, beste lagun bat atxilotu nahi zuten poliziek.

Horrez gain, Arrasaten Josu Arruabarrena (21 urte) oreretarra atzeman zuten poliziek. Eskoriatzan (Gipuzkoa) ikasten du eta Arrasaten egiten du astea, ikasle pisu batetan; han izan zen atxiloketa. Miaketa eta atxiloketa hau egiterakoan, gainera, poliziek beste hiru lagun atxilotu zituzten, «poliziei aurre egitea» egotzita; tartean, Mikel Bengoetxea oreretarra (21), Arruabarrenaren pisukidea.

Bengoetxea eta harekin batera atxiloturiko beste bi lagunek Bergarako epaitegian deklaratu zuten atzo arratsaldean bertan. Epailearen aurrean deklaratu ondoren, aske utzi zituzten hirurak.

Etxebizitzak eta lokalak

Poliziek «nahiko tratu zuzena» izan zuten Errenteria-Oreretako atxiloketetan, senideen eta lekukoen arabera. Oiartzunen, ordea, Etxeberriaren atxiloketa «bortitza» izan zen: poliziak haren etxera bultzaka sartu eta gaztea lurrera bota zuten, besteak beste, OARSOALDEKO HITZAk jakin duenez.

Atxilotuen etxebizitzez gain, poliziek beste hainbat lokal miatu zituzten eskualdean. Hala, Errenteria-Oreretan, Landare Elkartera sartu ziren lehenik poliziak, Haizea Iriarte gaztea hara eraman ondoren. Beranduago, 07:00ak pasatxo, Jose Erviti kaleko lokal bat arakatu zuten, madalenetan presoen aldeko txosna bihurtzen dutena. Xabier Lujanbio gaztea eraman zuten bertara poliziek, haren gurasoen etxea miatu eta gero.

Azken miaketa hau pare bat orduz luzatu zen, eta poliziak hainbat kutxa eskuan zituztela atera ziren lokaletik. Bertan bildutakoen aurka ere oldartu ziren poliziak, jarrera bortitza erakutsiz.

Lekukoen arabera, Landaretik ere hainbat gauza eraman zituzten poliziek: ordenadoreak, elkartearen diru kontuak, tabernako dirua edota txosten politikoak, besteak beste. Antza, bi lokal hauek «hankaz gora» utzi zituzten poliziek.

Errenteria-Oreretan, halaber, herriko gaztetxera sartu ziren poliziak, Gaztaño auzoan, Aitor Alberdi atxilotua bertara eramanda. Gutxienez, ordenadore bat ere eraman zuten hemendik.

Kataxulo eta Ibai-Ondo

Oiartzungo gaztetxea ere miatu zuten atzo goizean poliziek, herrian atxiloturiko Jon Mikel Otxoa bertara eramanda. 10:00etan hasi eta ia bi orduz miatu zuten eraikina, Oiartzungo alkate Aitor Etxeberria eta udal idazkaria bertan zirela. Izan ere, Udalarena baita erakin hau. Poliziek hainbat kutxa atera zituzten bertatik; lekukoen arabera, Abiadura Handiko Trenaren kontrako propaganda eta espraiak ere eraman zituzten, azken hauek gaztetxean grafiti bat egiteko erabiliak.

Lezon, bitartean, Ibai-Ondo etxera sartu ziren poliziak, 07:45ak pasatxo, eta Udaltzaingoan etxearen giltza eskatu ondoren. Izan ere, etxe hau Lezoko Udalarena dela uste baitzuten poliziek, Udalak berak atzo zehaztutakoaren arabera. Giltzarik ezean, Ibai-Ondoko beheko solairuko atea bortxatuta sartu ziren poliziak.

Lezoko Udalaren arabera, poliziak «bi edo hiru atxiloturekin» sartu ziren Ibai-Ondora. Lezoko bi zinegotzi bertara hurbildu ziren, miaketan lekuko gisa aritzeko. «Baina lekukoak bazeudela erantzun zieten poliziek», Udalak atzo jakinarazi zuenez.

Ibai-Ondoko beheko solairuan bakarrik izan zen miaketa. Udalaren esanetan, bidoi hutsak atera zituzten bertatik, «eta, bitxikeri gisa, Gazte Topaguneko pertsonaiaren mozorroaren burua».

Espainiako Poliziak, bien bitartean, azpimarratu du atzoko miaketetan ordenadoreak, propaganda, afitxak, DVDak, Segiren dokumentazioa edota telefono mugikorrak atzeman dituela.

Horrez gain, azpimarratzekoa da kazetari eta kameralari ugarik jarraitu zituztela zuzenean atzoko miaketak eta atxiloketak, Espainiako Poliziaren abisua jaso ondoren. Zenbait kasutan, komunikabideetako ordezkariak poliziak baino lehen iritsi ziren atxilotze eta miaketa lekuetara.



Arruabarrena, ospitalera

Askatasunak atzo arratsaldean jakinarazi zuenez, Josu Arruabarrena oreretarra Donostiako Ospitalera eraman zuten atzo, 13:40ean, «gastroenteritisak jota». Bi ordu eta erdi beranduago alta eman zioten gazteari.

Atxiloketak salatzeko, batzarrak eta manifestazioak egin zituzten atzo iluntzean Errenteria-Oreretan, Oiartzunen eta Lezon. Ehunka lagun bildu ziren protesta hauetan. Atxilotuek inkomunikatuta jarraitzen duten bitartean, egunero mobilizazioak antolatu ditu Oreretako Amnistiaren Aldeko Mugimenduak, 20:00etan Herriko Plazan, mobilizazioetan parte hartzeko deia eginez.

Joan den urteko uztailetik hona, Espainiako Poliziak egindako antzeko zazpigarren sarekada izan da atzokoa, denera, 69 lagun atxilotuz.