Oarsoaldeko Hitza

Elizalde Institutuko 13 ikaslek Errenteria-Oreretako Andoni Korta antzerki topaketetan parte hartuko dute.

Datorren asteazkenean, hilaren 23an, eskainiko dute euren lana, Antzerkiaren parada, Errenteria Hiria Kulturgunean, 11:30etik aurrera.

Antzezlana egingo duten hamairu ikasleak Juncal Aldaregia, Elisabet Arbelaitz, Miren Eskudero, Aitor Etxebeste, Amaiur Etxezurieta, Dani Fernandez, Sara Linazasoro, Nerea Martiarena, Suberri Matelo, Julen Otxotorena, Ainhoa Perutxena, Nerea Perutxena eta Jabier Zurro dira.

Dramatizazio tailerreko ikasleak dira

Ikasleek dramatizazio tailerrean landu dute antzezlan hori. Bi irakasleren laguntzarekin, eskolan eta Elorsoro kiroldegian lantzen dute tailerra hau DBH 4. mailako hainbat ikaslek, hautazko moduan.«Eurek sortu dute antzezlana», azaldu du Mari Jose Intxaurrandieta institutuko irakasleak.

Ez dira bakarrik sentituko, hala ere, oholtza gainean. Izan ere, institutuko ikasleak joango dira animoak ematera.

DBH 2, 3 eta 4. mailako ikasleak, ikusle

DBH 2.,3. eta 4. mailako ikasleak egongo dira ikusleen artean aurten.

Euren saio berean, Errenteria-Oreretako Telleri Ikastetxeko ikasleen lana ere izango da.

Serio hartuta dute antzerkia taularatzeko lana Elizalde Institutuko ikasleek, lehengo astean Errenteria Hiria Kulturgunean izan baitziren entseatzen.

Aspaldiko urtetako ohitura

Aspaldiko urtetan, ohitura da Elizalde Institutuko ikasleentzako Andoni Korta antzerki topaketetan parte hartzea. Aurten hamahirugarren aldiz ospatuko dituzte antzerki topaketok.

Haurtzaro Ikastolak ere parte hartu izan du Andoni Korta antzerki topaketa hauetan, baina aurten ez dute parte hartuko, adierazi dutenez, epe aldetik ez baitzaie ondo egokitu.