Oarsoaldeko Hitza

«Nire ustez inpartzialtasunetik milaka kilometrora dago epaimahaia. Konbentzituta nago gure kontrako sententzia idatzita dagoela, bultzada politikoz egin delako instrukzio hau. Hemen ez dut inolako justiziarik espero, orain arte ez eta aurrerantzean ere ez. Kondenatuko nau auzitegi honek, baina epaitu ez nau egingo. Iragartzen dut arrazoi horiengatik defentsa juridikoari uko egiten diodala. Eta hauexek dira hemen entzungo diren nire azken hitzak». Adierazpen honekin, defentsa juridikoari uko egin diote Amnistiaren Aldeko Mugimenduko (AAM) auzipetuek.

Atzo, 10:30ean abiatu zen Madrilgo Casa De Campo Amnistiaren Aldeko Mugimenduaren kontrako epaiketa. Mugimenduko bozeramaile Juan Maria Olano izan zen deklaratzen lehena, eta iragarri bezala, uko egin zion fiskaltzaren eta akusazioen galderak erantzuteari.

Olanoren ondoren gainontzeko 26 auzipetuek gauza bera egin zuten, baita Gorka Zulaika antxotarrak ere.

Atzo deklaratu zuten auzipetu guztiek «beren helburu bakarra espetxe politikaren ondorioak ezagutaraztea» izan dela nabarmendu zuten. «Preso gaixoak ez dituztela askatzen edo torturatu egiten dela salatzea». Gatazka konponbidean jartzeko eskatu zuten, eta horretarako elkarrizketaren bidea jorratu behar dela nabarmendu, errepresioa bazter utzita.

Epaimahaiak ez zien trabarik jarri mezu horiek emateko eta itzultzaileen lanarekin ez zen arazorik izan.

Defentsarako 250 lekuko

Atzo hasitako epaiketan Amnistiaren Aldeko Batzordeetako, Askatasuneko, Behatokiko eta Senideak elkarteko 27 lagun epaituko dituzte. Elkarte horietan egindako lanagatik eseriko dira akusatuen aulkian, ETAkoak izatea egotzita. Hala, hamar urteko espetxe zigorra eskatzen du haientzat guztientzat Auzitegi Nazionaleko Fiskaltzak.

Defentsarako abokatuek auzipetuek lan politikoa egin dutela azaltzen saiatuko dira epaiketan, zein, aurreikuspenen arabera, hiru hilabete iraungo duen. Astelehenetik asteazkenera bitartean izango dira auzi saioak, goiz eta arratsaldez, Auzitegi Nazionalean.

Defentsak 250 lekuko baino gehiago eramango ditu Maria Teresa Palacios buru izango duen eta Carmen Paloma zein Juan Francisco magistratuek osatzen duten 4. aretoko epaimahaiaren aurrera. AAMk 30 urtean egin duen lana azaltzen saiatuko da.

Fiskalaren eta AVT herri akusazioaren lekuko gehienak, bestalde, poliziak dira. Sei guardia zibil eta 44 ertzain deituko dituzte, baita Jorge Olaiz presoa eta Susana Atxaerandio eta Ibon Aranalde preso ohiak ere.