Oarsoaldeko Hitza

atxilotuetako lau aske gelditu dira, bermepean

Bermepean aske gelditu ziren atzo iluntzean. Haizea Iriarte, Alex Etxeberria, Beñat Burlada eta Gorka Etxeberria. Herenegun gauean Grande-Marlaskaren erabakia jakin eta berehala bermea ordaintzeko gestioei ekin zieten atxilotuen senideek. Hala, atzo eguerdian, bermea zegokion kontu korrontean sartu zuten, eta honen ziurtagiria Espainiako Auzitegi Nazionalera bidali zuten. Hori eginda, Auzitegi Nazionaletik askatze agindua bidali zuten Soto del Real espetxetik hurbilen zegoen herriko epaitegira, Colmenar Viejo herrikora (Madril), alegia. Hemendik, espetxera bidali zuten askatze agindua, eta iluntzean exekutatu zuten espetxean agindu hori.

Ostiralean atxilotutako gazteek tratu txarrak jasan dituztela esan dute

Sarekada poliziala

Hamar atxilotuetako bost espetxeratzeko agindua eman du Grande-Marlaska epaileak

erredakzioa

Ostiralean Errenteria-Oreretan, Oiartzunen eta Arrasaten atxilotu zituzten hamar gazteek Espainiako Poliziaren esku inkomunikatuak egon diren bost egunetan tratu txarrak jasan dituztela salatu dute. Gainera, atxilotuak izan ziren hamar gazteetatik bost Madril inguruko presondegi hauetan espetxeratzeko agindua eman zuen, deklarazioa hartu eta gero, Fernando Grande-Marlaska Espainiako Auzitegi Nazionaleko epaileak: Josu Arruabarrena eta Aitor Franco Alcala Meco espetxera eraman zituzten atzo goizean; Xabier Lujanbio eta Harkaitz Antza Soto del Real espetxera, eta Aitor Alberdi, berriz Valdemoroko espetxera. Espetxeratzearekin batera, inkomunikazio aldia ezabatu zieten bost atxilotuei.

Haizea Iriarteri, Beñat Burladari eta Gorka Etxeberriari 3.000 euroko askatasun bermea jarri zien, eta Alex Etxeberria oiartzuarrari, berriz, 6.000 euroko bermea. Jon Mikel Otxoa baldintzarik gabe aske utzi zuen Auzitegi Nazionaleko epaileak. Bermepean aske gelditutakoak, atzo, 18:00ak inguruan atera zituzten Soto del Real espetxetik.

Tratu txarrak Madrilen

Askatasuna erakundeak publiko egin duenez, «oro har, buruan kolpeak jasan dituzte, biluzik edukiarazi dituzte, eta haien senideak atxilotzeko aginduak erakutsi dizkiete».

Askatasunatik nabarmendu dute Xabier Lujanbiok eta Haizea Iriartek, inkomunikatuak izan ziren bitartean izan zituzten tratu txarrak: «Xabier Lujanbio eta Haizea Iriarte bikote dira. Bi gela ezberdinetan zeudela, Xabierrek Haizea ikus zezakeen kristal baten bitartez. Poliziek Xabierri galderak egiten zizkioten, eta erantzuna beraien gustukoa ez bazen, pixkanaka Haizea biluzten joaten ziren».

Jon Mikel Otxoaren hurbilekoek OARSOALDEKO HITZAri esandakoen arabera, atxilotuak Donostian izan ziren bitartean polizien tratua «zuzena» izan zela esan dute. Madrilera autoz atera zirenean, alta, «gero eta jarrera erasokorragoa hartu zuten, tratu txarrak areagotuz». Herenegun gauean, Otxoa Espainiako Auzitegi Nazionaletik atera zenean, berak «eskuarekin eta borrekin golpeak jaso» zituela esan zien hurbilekoei, «baina berak uste du besteek tratu txar gogorragoak jasan dituztela».

«Zigorgabetasun osoa»

Tratu txar kasu hauekiko irakurketa egin du Askatasunak. Errepresioaren kontrako erakundearen esanetan, «Espainiako Poliziak zigorgabetasun osoa du euskal gazteak atxilotu, inkomunikatu, torturatu, espetxeratu eta sakabanatzeko».

PSOEri esan diote «bere agintaldia bortizkeriaren aldeko apustua berretsiz» hasi duela, eta «tratu txar hauen aurrean euskal klase politikoak erakusten duen isiltasun konplizea» salatu dute Askatasunatik.