Oarsoaldeko Hitza

Hilaren 18an Oiartzunen eta Errenteria-Oreretan atxilotutako Alex Etxeberriak, Jon Mikel Otxoak, Beñat Burladak, Gorka Etxeberriak eta Haizea Iriartek Torturaren Aurkako Taldeko (TAT) Ane Ituiño eta Aiert Larrarterekin batera, inkomunikazio egoeran egon diren bost egunetan jasandako torturak salatu zituzten atzo, Donostiako Anoeta Hotelean egindako prentsaurrekoan.

Atxilotuen aurka erabilitako tortura metodoak azaltzeaz gain, epaitegian salaketa jartzeko izan dituzten arazoak plazaratu zituzten. Aiert Larrarteren esanetan, Donostiako bigarren instrukzio epaitegiko epailea ez zen torturak salatzen zituzten bitartean gela berean egon, «beste gela batean jasotzen zituen atxilotutakoen testigantzak idatziz»: «Harrituta eta haserre gaude epailearen jarrerarekin».

Horrez gain, Larrartek zehaztu zuen abokaturik eta prokuradorerik izaten ez zietela utzi salaketa jartzean: «Epaitegiko mediku forentseek bertan bakoitzari azterketa fisikoa eta psikologikoa egiteko eskatu genuen, eta epailea horretara ere ukatu egin zen».

Bigarren instrukzioko epaitegiko epailearen jokabide horrek «probak galtzea» dakarrela nabarmendu zuen TATeko kide Larrartek.

Ibeas, atzotik aske

Gaizka Ibeas gazte oreretarra, aldiz, atzo atera zen Madrilgo Soto del Realgo espetxetik, bermea ordainduta.

Atzo goizean ordaindu zuten gaztearen senideek Auzitegi Nazionaleko 3. aretoko Fernando Grande-Marlaska epaileak jarritako bermea, 6.000 euro, hain zuzen ere.

Edizio hau ixterakoan, baina, oraindik espetxean zegoen Errenteria-Oreretako gaztea. Hala ere, nahi eta nahi ez utzi behar zuten atzo aske.

Iker Iraola, Ibeasekin batera asteartean atxilotutako beste gaztea, aldiz, herenegun 23:30ak aldera iritsi zen herrira eta ongietorria jaso zuen.

Sumarioak sekretuan jarraitzen du oraindik. Askatasunak azaldu duenez, «akusazio orokorrak ezagutu ditugu, kale borrokako ekintzetan parte hartzea edota Segiko kide izatea egozten zaiela, eta bakoitzaren egoera pertsonala zertan gelditu den, baina ez bakoitzari zehatz-mehatz zer egozten zaion».

Borroka Egunean, lasaitasuna nagusi

Atzo, baita ere, ezker abertzaleak deituta borroka eguna izan zen Errenteria-Oreretan eta Oiartzunen.

Errenteria-Oreretan, EAE-ANVko zinegotziak, premiazko prozeduraz, sarekadaren inguruko mozioa sartzen saiatu ziren. Ez zioten onartu, beraz, ez zen eztabaidarik egon.

Eguerdian eta arratsaldean, manifestazioak izan ziren. Bietan, herritar askok erantzun zioten deialdiari.

Oiartzunen, berriz, komertzioan lan-uztea eta manifestazioa izan ziren eguerdian. Erantzuna «ona» izan zela zehaztu zuten. Arratsaldean, oraindik jende gehiago izan zen manifestazioan.

Borroka egun honek Amnistiaren Aldeko Mugimenduak astelehenean euren kontra Madrilen hasi berri den epaiketaren kontrako mobilizazioekin bat egin zuen, era berean.

Don Boscoko langileen «elkartasuna»

Don Bosco Ikastetxeko langileek, era berean, «gure ikasle eta ikasle ohi atxilotuen familiei elkartasuna» adierazi diete, «eta atxilotuen errugabetasun eskubidea aldarrikatu» zuen.

Inkomunikaturik egon diren bitartean jaso duten tratuaren inguruan «kezka» agertu zuten Don Boscoko langileek. Era berean, «gazteek ikaskuntza prozesuarekin jarraitu ahal izateko prestutasun osoa» ere badutela azpimarratu dute prentsa ohar bidez.

Don Boscoko 50 bat irakaslek sinatu dute adierazpena.