Oarsoaldeko Hitza

Dantzari txikien egun handia izango da bihar Errenteria-Oreretan. Dantzari gazteak herriko jaun eta jabe izango dira; 600 dantzari eta musikarik herriko kaleak hartu dituzte. Aurten ere, maiatzaren 1ean ohi denez, hutsik egin gabe Ereintza Dantza Taldeak antolatuta dantza izango da nagusi herrian.

Aurtengo saioan, beste urteetan bezala, ehunka haur elkartuko dira, beraien eginkizuna zintzo betetzeko. Kaleak dantzaz betetzeko, alegia. 10 taldetako haurrak ariko dira zeregin horretan: Lezoko Murixka, Oiartzungo Haurtzaro, Azkoitiko Kandiola, Urretxuko Lurra, Beasaingo Aurtzaka, Añorgako Arkaitz, Hernaniko Ttarla, Dimako Gazte Berri, Lasarte-Oriako Erketz, Iruñeko Amaiur, eta etxekoak, Errenteria Musikalekoak.

Errenteria Musikaleko dantzariak izango dira gehienak; 200 dantzari gazte irtengo dira.

Ekitaldia Zumardian, euririk ezean

Eguneko ekitaldia Gamon Zumardian izango da, baina, lehenago, herriko kaleetatik desfilea egingo dute, tarteka dantza egiteko etenak eginez; desfilearen burua Foru Plazara iristean egingo da lehen etena, eta Herriko Plazan bigarrena. 11:30ean abiatuko dira Telleri eskolatik, han hamaiketakoa jan ondoren. Gero, esan bezala, Zumardira abiatuko dira, eta han, azkenik, ekitaldi handia egingo dute, oholtza gainean. Bertan, Agurra, Abaltzisketako Txantxoak, Zapatagin dantzan, Txulalai, Makil txiki berria, jorra dantza, Boastitzea, Makil handi, Uztai handi eta Fandangoa eta Arin-arina dantzatuko dituzte.

Eguerdia pasatuta iritsiko dira, ondo bidean, Gamon Zumardira, eta bertan ehunka ikusleren aurrean erakutsiko dute zer egiteko gai diren. Euria eginez gero Galtzarabordako kiroldegian egingo dute festa.

Herriko elkarte laguntza, ezinbestekoa

Ondoren, indarberritzeko herriko hainbat elkartetara joango dira bazkaltzera: Niessen, Amulleta, Alkartasuna, Gure-Toki, Ondarra, Txintxarri, Gau-Txori, Txepetxa eta Bukagaitzera joango dira. Begiraleak, berriz, Landare Elkartera joango dira. Elkarteen lana goraipatu nahi izan du Juantxo Maya Ereintza Dantza Taldeko lehendakariak. «Haur guztiak ezin hobeto tratatzen dituzte. Festa ezinezkoa litzateke haiek gabe», azaldu du. Horrez gain, beste zenbait laguntzaile ere azpimarratu ditu Mayak, Errenteriako Udala eta Errenteria Musikal musika eta dantza eskola.

Bazkariaren ondoren, arratsaldeko ekitaldia hasiko da. Modesto musika joleak eta bere organoak gaztetxo guztiak datzan jarriko ditu, 17:00etatik aurrera. «Urteak daramatza nafarrak herriko Dantzari Txikian parte hartzen, eta dagoeneko gaztetxo guztiek ezagutzen dituzte bere organotik irteten diren doinuak», azaldu du Mayak.