Oarsoaldeko Hitza

Pasa den asteburuan Allerru Judo Taldeko Haur Mailako judokek Gipuzkoako Taldekako Txapelketan hartu zuten parte, eta lehen postuan gelditu ziren gainerako aurkari guztiak mendean hartu ondoren.

Donostian egindako txapelketan «oso parte hartze urria» izan zela azpimarratu dute Allerru Judo Taldeko arduradunek: «Mutilen mailan sei talde aurkeztu ziren eta nesken mailan, berriz, bi. Orain bi aste Alebinen Mailan egindako txapelketan 28 taldek hartu zuten parte, beraz, zerbait gaizki egiten arituko gara parte-hartzea horren baxua izateko».

Neskak, lehen postura zuzenean

Gipuzkoako Taldekako Txapelketan bi nesken taldek eman zuten izena, baina azken unean Club San Sebastian taldeko kideak ez ziren agertu. Hori dela medio, epaileek zuzenean lehen postua eman zieten neska lezoarrei.

Dena den, lehen postua eskuratzeaz gain, epaileek beren mailako mutilen aurka aritzeko aukera eskaini zien, eta ongi aprobetxatu zuten judoka lezoarrek eskainitako aukera, izan ere, irabazi egin baitzuten.

Mutiletan, bost talde bakarrik

Mutilen kategorian azken unean ere beste talde batek kale egin zuen eta bostek hartu zuten parte. Allerru Judo Taldetik Jon Ander Esponda, Aritz Sagarzazu, Jon Duran, Beñat Gaiza, Xabier Cazorla eta Xabier Eizagirre izan ziren.

Erakustaldirik onena Aritz Sagarzazuk eskaini zuen. 40 kilo ditu Sagarzazuk eta 50 kilotik beherako mailan borrokatu behar izan zuen.

Haur Mailako taldekako txapelketaz gain, Benjamin Mailako lehia ere izan zen pasa den igandean Donostian. Hamabi taldek hartu zuten parte. Allerruko judokei Ama Guadalupekoa eta San Jose taldeen kontra aritzea suertatu zitzaien, besteak beste.